Gobierno a cambia e prome fecha pa paga plachi di number

ORANJESTAD – Gobierno a (bolbe) cambia e prome fecha di pago di number di auto di 31 di januari 2020 pa 28 di februari 2020. Asina minister di Finanza Xiomara Maduro a bisa den un conferencia di prensa. E hecho cu el a bisa e portal aki (noticiacla.com) algo otro algun siman pasa, ta pasobra e momento ey, e mester a ‘bisa esey’, sino un grupo grandi lo no a bay paga. Cu e cambio di fecha, ta nifica cu tur hende cu no a paga ainda, (13 mil y pico a paga caba) por tin mas tempo pa paga, aunke ta responsabilidad y ley pa paga cierto fecha.

FECHA ORIGINAL

Algun siman pasa e portal aki, anticipando e critica y tardansa di ricibi e plachinan di number di auto cu ta keda otorga te na maart proximo, a puntra e mandatario si ta bay cambia e fecha di 31 di januari 2020 como e fecha. E mandatario e momento ey, a bisa cu ‘no, no ta cambia e fecha’. Sinembargo algun siman despues, e mandatario a cambia e fecha toch. Motibo duna, ta cu mester a evalua e situacion toch y si a bisa esey e tempo ey caba, hopi hende lo no a bay paga. Awor sinembargo tin por lo menos 13 mil hende cu ya a caba a paga nan plachi di number. Esey no ta kita afor, cu ta un responsabilidad di e pueblo pa cumpli cu pago.