Oduber: Cambio di director na FLPD lo no trece cambio toch

ORANJESTAD – Aunke cu Fundacion Lotto pa Deporte a anuncia un cambio den director, esaki lo no trece cambio toch segun minister encarga cu Lotto, esta Dangui Oduber. Asina e mandatario a bisa e portal aki (noticiacla.com) riba e tema. “ Enberdad mi a wordo informa cu sr Wernet a wordo retira y despues di a gana su caso den corte a yega na un acuerdo pa e por bai. Lamentabel ta e hecho cu keto bai e stempel berde ta keda den Lotto” e mandatario a cuminsa na bisa. Segun Oduber, e motibo ta cu a keda den seno di AVP, esta e ex consehero di ex minister Alex Schwengle, cu ta Roland Tuitt.  “ Cu e nombracion aki nos como gobierno no ta spera ningun cambio den Lotto” Oduber a bisa. Como tal, segun e mandatario, keto bai e fundacion ta secuestra oa activistanan di AVP cu no kier sigui maneho di minister conforme e statuut di Lotto.

CAMBIO DI LEY

Segun e mandatario, e ley cu e cambionan pa un Lotto nobo a wordo entrega na parlamento y gobierno ta pendiente ki dia esaki por wordo trata. “Lotto y Canadian banknote ya caba a menaza gobierno cu si en caso bini competencia nan lo entrega un claim miyonario contra gobierno di Aruba. Como gobierno nos ta kere den comptencia y marktwerking y a yega e momento pa bin comptencia pa Lotto pa deporte” Oduber a sigui bisa. “ No por ta asina cu deporte ta sangrando, tur facilidad den decadencia, Canadian Bank Note birando mas rico y nan kier prohibi competencia. Nan no ta den posicion pa dicidi si ta bin competencia of no” e mandatario a finalisa bisando.