Colegio Arubano a cuminsa controla alumnonan relaciona cu menasa

ORANJESTAD – Alumnonan yegando Colegio Arubano na Playa dialuna mainta, mester a pasa un control serio na entrada, pa seguridad despues cu e scol a ricibi un menasa diabierna siman pasa. Manera cu noticiacla.com a raporta diabierha caba, basa riba un carta cu Colegio Arubano a manda pa mayornan referente e menasa, lo a implementa cierto reglanan estricto nobo, entre nan e control cu a cuminsa awe mainta. 

REGLA 

E carta riba cual e portal aki a referi na dje diabierna, ta encersa un lista di punto cu e scol a ‘introduci’ pa asina limita cualkier riesgo relaciona cu e menasa. Mientras cu e tipo di menasa no ta specifica den e carta, ta papia riba un posibel ‘tiramento’, esta shooting. Segun mayornan, esaki ta pa purba spanta e scol y cancela e CP week (Centraal Proefwerk week) cu ta inicia awe. 

KICO TA SOSODE

Segun e carta, esaki ta e puntonan cu e scol a tuma y cu lo tin cu wordo aplica. 

1. Tur CP y SE ta sigui dialuna 13 di januari segun e rooster.

2. Den e dianan venidero lo tin extra vigilancia presente na Colegio Arubano.

3. Nos lo procede cu un control preventivo; esaki kier men cu lo controla tur tas y rista (fouilleer) tur hende cu pisa tereno di scol.

4. Ta pidi tur mayor pa nan papia cu nan yiu tocante esaki y pa controla nan tas di antemano. Laga nan bin scol cu unicamente material necesario pa traha CP/SE.

5. Na final di e CP/SE ta pidi tur alumno pa bandona tereno di scol y ta urgi e mayornan pa percura pa transporte asina cu nan yiu caba di traha e CP/SE.

6. Den caso cu un alumno no traha e CP/SE, e reglanan normal ta keda vigente pa bin na remarke pa haci un inhaal CP/SE, esta un carta di Medwork.

7. Asina cu e investigacion termina, nos lo informa boso debidamente.

PANICO

E scol ta sigura cu na e momento aki no tin motibo pa panico, pero ta reforsa e seguridad pa tur hende cu ta riba tereno di scol. “Nos tin confiansa den e profesionalnan cu ta asisti nos y nos lo percura pa e dianan di scol venidero ta trankilo y ordena” e carta ta finalisa bisando. Polis mientrastanto ta investigando e caso.