“Maestro di Aña 2014” Charity Croes-Filiciana reconoci

ORANJESTAD - Recientemente a reconoce e maestro di aña 2014, Charity Croes-Filiciana. “A Teacher affects eternity, he can never tell where his influence stops” esaki ta e dicho cu ta aparece riba cada certificado cu a entrega na e cinco nominadonan pa e premio tan cotiza “Maestro di aña 2014”.Minister Michelle Hooyboer-Winklaar a dirigi su mes na e nominadonan,  e ganado Charity Croes-Filiciana, cabesantenan di e scolnan ganado, algun invitado y sin lubida Ilan Lopez di CMB, patrocinado di e evento aki pa e ultimo 3 añanan.

Ta intencion di Gobierno pa trece cambio den e escogencia pa otro aña, pa asina reconoce un grupo mas grandi entre e maestronan cu ta destaca. No a informa cu exactitud ainda riba e cambionan y e forma con lo implementa esaki, pero ta un hecho cu di tanto maestro cu ta traha diariamente den e ramo, cu mester por duna atencion y pone luz riba un grupo mas grandi cu solamente 5 nominado. 

Cabesante di Arco Iris Kleuterschool, Nelly Orman–de Cuba ta hopi orguyoso cu docente Charity Croes-Filiciana a keda nomina pa dos aña consecutivo y e aña aki a resulta e ganado. “Nos ta traha duro y cu hopi amor y ta tuma e chikitinnan cu ta e base di nos comunidad hopi na serio, ya ta esaki ta wordo mira bek den e premio Maestro di Aña 2014”.

Charity Croes-Filiciana a gradici Dios pa e reconocimento y a splica cu ta su chikitinnan den kleuterschool ta su premio, sin nan e lo no a yega asina leu. E maestra di aña a sigura cu cada dia e ta siña for di e muchanan aki. Nan forma spontaneo y sobrevivencia ta indicacion pa ta humilde y gradici cada dia cu por ta hunto cu nan.

Ilan Lopez, Marketing Specialist di CMB a haci entrega di pasashinan pa 2 persona pa Miami, USA y ademas 2000 dollar pa e ganado y e cuater nominadonan a ricibi 500 florin cada un. Pa CMB e proyecto aki ta di gran balor ya cu ta stimula e miho nan di Aruba pa mehora calidad di enseñansa y traves di esaki mehora futuro di nos pais.