Minister mes no tabata na altura di carta riba alerta pa tsunami

ORANJESTAD – Minister di Salud Dangui Oduber mes no tabata na altura di e awor 'famoso' carta interno cu mensahe di alerta pa tsunami pa Aruba, sino te ora cu esaki a circula diabierna y a bay viral. Asina e mandatario a confirma na noticiacla.com diabierna anochi. E carta su contenido a indica cu Aruba tabata bou di un alerta pa tsunami y cu tur instancia concerni mester a prepara nan mes. 

TUMA NOTA 

“Na momento cu e “carta” a bay viral, mi mes como minister a tuma nota di e carta. Mi no a wordo informa prome cu tin un “carta” asina sensitivo cu a bay pa tur empleado di DVG, como 'first responders' den caso di calamidad,” Oduber a bisa. Segun e mandatario, el a tuma contacto mesora cu esun cu a skirbi e carta. “Logicamente despues cu e carta a bira conoci mi a tuma contacto cu s.r Staring pa puntre kiko ta pasando y asina informa mi mes di e situacion di panico inecesario cu a wordo crea”.

PANICO

E mandatario ta admiti cu e asunto a crea un panico innecesario pa e forma con e comunicacion a bay. “ Henter e situacion di panico aki por a wordo evita si a communica cu gobierno y cu communidad. Riba dje e no tawata un tsunami alert sino un tsunami watch!” Oduber a finalisa bisando.