Polis investigando menasa serio contra Colegio Arubano

ORANJESTAD – Polis a confirma diabierna atardi cu en berdad tin un investigacion andando contra un menasa cu a drenta na Colegio Arubano diabierna mes. Sinembargo no ta specifica ki tipo di menasa esaki ta. Unabes cu e scol a ricibi e carta of mensahe di menasa, nan a haci e denuncia mesora na polis. Polis na su turno a inicia un investigacion mesora. E scol mientrastanto a informa e mayornan diabierna caba di e menasa via un carta, y a informa nan tambe di e pasonan cu nan ta tumando pa loke ta seguridad. Den e carta e scol tampoco ta specifica ki tipo di menasa esaki ta.

E MAYORNAN

Mientrastanto riba Facebook, e mayornan a cuminsa papia riba e tema y speculando kico e menasa por ta. Ta speculando cu e por tin di haber cu e hecho cu otro siman ta cuminsa un siman di CP (Centraal Proefwerk) week, y cu e menasa aki lo tin como consecuencia pa interumpi e CP week. Mes momento e mayornan ta indica, aunke cu scol a informa nan di e situacion, esey no ta kita e preocupacion di e mayornan. 

MEDIDA

E scol mientrastanto a tuma medida pa e proximo simannan, pa asina evita cualkier posibel peliger pa e scol y esunnan cu ta bay e scol, tanto e alumnonan como e docentenan y resto di facultad.