Rodriguez: No ta tur hende por haci e trabou na Slachtoffer Hulp

ORANJESTAD – Aruba tin un problema social grandi, y no tur hende por haci e trabou cu un trahado di Slachtoffer Hulp ta haci tur dia. E dos cosnan ey a resalta durante e programa NoticiaCla LIVE cu invitado Janine Rodriguez diahuebs anochi. Rodriguez a keda nombra como e Personahe di Aña 2019 pa Noticiacla.com fin di aña, y a ricibi su premio diahuebs anochi. Durante e combersacion, hopi cos a sali afo y a bira conoci riba tanto bida di Rodriguez, pero mas importante, e trabou cu e ta haci. Esaki ta e prome den un serie di articulo riba combersacion cu Janine Rodriguez. 

E TRABOU

Janine Rodriguez ta haci e trabou di trahado social pa Slachtoffer Hulp pa hopi aña caba y 4 aña ta cubri henter e isla completamente su so. Un trabou cu pa regla, tin su orario pero manera cu Rodriguez ta opera, no conoce ora. E trabou di Rodriguez, ta pa brinda sosten na esnan cu a keda afecta pa sea un accidente, un calamidad, un evento unda cu mester di sosten humano. Pensa riba ora cu tin un accidente cu a tuma lugar y un persona na e sitio a fayece. Of a hinca of tira un persona mata, y e famia yega y haya e situacion ey. Ta na Rodriguez pa trata cu e famianan y brinda nan ayudo, manera e nomber ta bisa. Por ta tambe cu un persona a haya su mes den un calamidad y ta bira un victima su mes y e mester di ayudo. 

ONE MAN SHOW

Riba un isla manera Aruba cu a caba registra su di 88 mil auto, y unda cu oficialmente nos tin mas di 110 mil habitante riba un pida baranca chikito, e ‘eventonan’ cu ta sosode ta enorme, y sigur si ta un persona so mester cubri e tereno completo. Rodriguez a confesa na noticiacla cu pa 4 aña e so tabata run e departamento aki, y tabata parti su mes na varios pida. El a logra esaki debi na e forma di dje di traha organisa, trata hende bon, y no perde tempo. Importante ta e character di e persona. 

CARACTER

“Bo mester ta prepara. E trabou aki bo mester tin curason p’e. Si bo no tin curason p’e, no bini. No haci’e mes pasobra bo lo ta sinta riba un telefon henter dia” Rodriguez ta cuminsa na bisa. E ta studia berdad pa trahado social, pero ta su abilidad personal ta pone cu e ta logra haci loke e ta haci, y den e tempo cu e ta logra hacie. Un persona cu traha den e ramo aki, mester ta fuerte. Pero tambe ora cu Rodriguez caba trata un caso, e ta bay banda di laman y sinta keto. E tin un chatgroup di famia y rumanan tambe unda cu nan ta sostene otro, hari, papia coi kens y distrai. Esey ta algo cu e mester. Tambe cu coleganan ta repasa kico por a bay miho etc. 

E TRABOU

Su trabou ta cuminsa momento cu e haya un yamada di p.e. Centrale Post di polis. (E ta traha como parti di cuerpo policial tambe). “Centrale Post ta yamami. Mane Centrale Post yamami, mi pregunta na nan ta, kico a pasa. Con leu e ta? E ta morto?. Mi ta haci mi preguntanan pa ora cu mi yega, mi ta bon prepara pa mi drenta aden mesora” Rodriguez ta sigui bisa. Eynan e ta haya famianan destrosa, kibra y hopi biaha cu nan mes mester di ayudo. Ora cu bisa cu famia ta bira fastioso na accidente cu morto, esey no ta berdad segun Rodriguez. “Nan kier sa kico a pasa. Nan kier wak, conta nan kico a pasa” Rodriguez a bisa. E tin cu trankilisa e personanan aki cu no ta facil. Tin cu no ta compronde y ta cuminsa zundra, y tin cu ta bay den shock y mester di ayudo medico. Y Rodriguez ta yuda e persona(nan) te na final. Y djey ta cera e caso y ta sak’e tambe for di su mente.