DIP: Habitantenan ilegal ta habita cas, stroba esnan legal di por biba

ORANJESTAD Un punto cu ta presenta na DIP ta, cu varios reclamo ta drenta cu e hendenan no tin cas, y na momento cu DIP bay controla, ta topa cu e personan cu ta habita den e casnan, no ta ni inscribe na Aruba. Asina e director Haime Croes ta bisa den un comunicado. Segun Croes, varios di esnan no inscribe ta illegal riba nos isla. Un situacion na unda cu DIP mester invulcra otro departamentonan pa presenta na sitio, considerando e aspecto humano. 

ONTRUIM

Ta bon pa menciona, cu DIP no ta jega ontruim di biaha. DIP ta tuma e aspecto humano hopi serio den consideracion prome cu actua. Alaves nos ta pidi advies di Sociale Zaken y algun otro departamentonan relaciona cu e situacion peculiar cu ta presenta. DIP tin pasenchi y nos meta principal ta pa mantene orden y aplica ley, y na final duna cada persona e tempo necesario conforme cu ley pa nan busca un otro hogar. Na final, e doño mester kita tur cos riba e tereno y mantene esaki pa  plantacion of pa locual el a wordo otorga.