Te cu november 2019 DIMP a registra 87% di e entrada prespuesta

ORANJESTAD – Cerando luna di december 2019, departamento di impuesto di Aruba (DIMP) a registra 731.6 miyon florin na entrada di impuesto te cu November 2019 cu ta representa 87% di loke ta e presupuesto total pa 2019. E presupuesto total ta poni na 845.2 miyon florin, cu segun e director Luenne Gomez Pieters, ta uno hopi grandi y pisa. Ora cu keda cla cu e cifranan di December 2019, por haya un bista completo di loke realmente keda registra na pago di impuesto, versus e loke tabata presupuesta. 

CAFT

Durante transcurso di aña semper e colegio di supervision financiero CAFT, tabatin critica riba e entradanan genera pa Departamento di Impuesto, indicando cu e no tabata genera e placa presupuesta, mientras cu ta conoci cu mester warda e aña completo pa por huzga, ya cu tin diferente tipo di impuesto cu conoce diferente faceta di pago durante transcurso di aña manera grondbelasting, winstbelasting y dividendbelasting  cu ta pone cu e pronostico no ta cuadra hopi biaha cu e expectativa di CAft. Esaki ta algo cu tabata irita e colegio di supervision financiero mirando cu na final di dia si tabata cumpli cu e normanan stipula pa cu presupuesto di pais Aruba. Asina cu e cifra nan ta conoci lo manda esakinan na e departamentonan concerni pa asina traha ariba e rapport final di aña 2019.