Accion di trahadonan di CITGO a cambia bek pa uno di morocoy

SAN NICOLAS – E accion total di un grupo di trahado di CITGO Aruba Refinery a cambia bek pa accion di morocoy diahuebs merdia. Asina e presidente di sindicato FTA Hubert Dirksz a bisa noticiacla.com. “ Nos a reuni 10'or cu mediador y gerencia di CITGO. Nos a reuni cu e trahadornan y dicidi cu nos ta keda cu accion di morocoy” Dirksz a bisa. E trahadornan cu mester a bay traha a bay traha, Dirksz a sigui bisa. “Mediador a haci intento pa nos por a reuni awe mes cu gobierno y RDA pero no a logra. IOWUA ta reunionendo awor aki cu gerencia CITGO y despues cu gobierno Rda. Gobierno lo reuni mayan atardi 3'or cu FTA” Dirksz a finalisa bisando. 

E ACCION

Manera cu Noticiacla.com a raporta diaranson, e trahadonan di CITGO Aruba Refinery cu ta miembro di sindicato FTA a bay den accion pa protesta e situacion cu tin di inseguridad pa cu nan futuro trabou. E accion lo perdura te ora cu tin claridad di parti di e compania, mientras cu tin reunionan programa cu entre otro mediador di gobierno y tambe Utilities den e dos siguiente dianan pa wak si tin claridad. A pidi pa e trahadonan afilia na e otro sindicato, esta IOWA (Independente Oil Workers Union of Aruba) tambe uni cu esnan di FTA pa asina e grupo bira mas grandi. 

E PROBLEMA

Manera cu e portal aki a raporta caba, un grupo di trahado di CITGO Aruba Refinery (CAR) cu ta miembro di sindicato FTA, ta drenta den accion diahuebs mainta. Asina presidente di sindicato FTA Hubert Dirksz a bisa e Gerente general Joe Crawford den un carta diaranson merdia. “Nos ta inform abo cu e ‘accion di morocoy’ lo escala den un ‘accion di protesta’ y lo cuminsa 7’or mayan mainta y lo continua te ora cu (e compania) cumpli cu nos demanda”. E demanda ta pa CAR no firma ningun ‘transfer agreement’ cu RDA y of gobierno te ora cu tin contesta concreto riba e futuro operacion di e refineria/terminal y futuro empleo pa e trahadonan. 

E CARTA

E carta di dos pagina ta cuminsa na referi na e contesta di e refineria riba e prome carta cu FTA a manda pa e compania, indicando nan caba di e accion di morocoy. Tambe FTA ta informa cu nan a tuma nota cu CAR ta den e stadio final di firma e asina yama ‘Temporary Suspension Transfer Agreement’, cu ta nifica cu tur responsabilidad ta keda transferi pa sea gobierno of RdA. Segun FTA, si CAR firma e acuerdo aki sin cu tin acuerdo concreto riba futuro di e trahadonan despues di e fecha di transferencia di e trahadonan, CAR lo ta violando su obligacion legal pa actua como un doño di trabou responsabel y por ta responsabel pa tur daño pa su trahadonan. Como tal e trahadonan ni e sindicato lo acepta e firmamento bou di e circumstancianan ey. Tambe e sindicato ta mustra cu no ta responsabel pa negosha un pakete di cesantia si no tin contesta cla riba e futuro ni ken ta tuma over. Lesa e carta completo AKI. Potret ta cortesia di FTA