SMAC: Festival di Tumba 2020 ta sigui pero cu otro fecha

ORANJESTAD – Festival di Tumba di Carnaval pa 2020 ta sigui! Asina miembro di SMAC Darren van Ommeren a confirma pa noticiacla.com diaranson mainta. Despues di un reunion urgente cu a tuma lugar diamars anochi riba e tema cu tur esnan envolvi, a dicidi cu ta sigui, pero cu ta cambia e fecha pa dia 8 di februari 2020 den Carnival Village. “Awor ta na nos di SMAC pa hinka tur e punto nan aki den otro pa sali cu un promoshon potente pa por atrae mas publico posibel pa bin presencia nos festival di tumba 2020” van Ommeren a sigui bisa. 

CON A BAY CU REUNION

E reunion cu a tuma luga a bay den bon ambiente segun van Ommeren, unda cu tur hende por a trece nan punto di bista y unda tambe a intercambia ideanan conhuntamente. “Mester bisa cu Aruba por bay presencia un tremendo festival di Tumba e anja aki. Cu un serie di bon compocishon unda nos publico por disfruta y baila aya den Carnival Village” van Ommeren a sigui bisa. 

YAMADA URGENTE 

Manera por corda, SMAC a haci un yamada urgente diamars 7 di Januari pa lidernan di banda y cantantenan di Tumba reuni e anochi ey na cede di SMAC. “Den e reunion aki nos a sinta i delibera pa con por hasi e existencia di Festival di Tumba mas stabil, cu un bida largo” van Ommeren a finalisa bisando.