Tin alerta di seguridad pa Mericanonan riba Caribe Hulandes

WILLEMSTAD – Consulado Mericano na Corsou na nomber di gobierno Mericano diamars a emiti un alerta di seguridad pa tur Mericano riba islanan di Caribe Hulandes, incluyendo Aruba, Bonaire, Curacao, Saba, Sint Eustatius, Sint Maarten. Esaki relaciona cu e situacion tenso cu tin na Medio Oriente. “Tin un tension aumenta den Medio Oriente cu por resulta den riesgonan di seguridad pa ciudadanonan Mericano den exterior” e comunicado ta cuminsa bisa. “Personal di consulado Mericano y ciudadanonan Mericano den Caribe Hulandes ta wordo encurasha pa revisa nan practica di seguridad y contact autoridad local pa cualkier asunto di seguridad”. Consulado Mericano a bisa cu lo sigui revisa e situacion di seguridad y prove informacion adicional si ta necesario. 

SITUACION TENSO

E situacion ta tenso desde cu Merca a tene un atake di drone riba Iraq, cu consecuencia cu e comandante mas halto di e pais a fayece. Esey a crea un situacion di tension halto den e region, unda cu paisnan manera Iran y Iraq a hura pa venganza contra Merca entre otro. Paisnan den cercania y aliado di tanto Iran y Merca ta vociferando nan mes y e tension por escala di un forma pa otro. A base di esaki, gobierno Mericano ta preparando su ciudadanonan rond mundo pa un eventual ‘acto di represaya’. Cualkier Mericano awor por bira un blanco di atake, si tin cu kere e menasanan di e gobiernonan radical di Medio Oriente.