Conseho di Minister di Reino Hulandes ta laga Aruba hala poco rosea ainda

DEN HAAG – Gobierno di tanto Aruba como St Maarten no a haya ordennan nobo for di Conseho di Minister di Reino, manera cu a spera. Despues di e reunion anticipa di diabierna mainta, e minister hulandes encarga cu Reino Hulandes, Ronald Plasterk a declara cu e kier atende cu e problema di integridad di St Maarten, cu e gobierno nobo cu pronto lo tin cu sinta. Pa loke ta Aruba, e ta haya mas tempo pa drecha su asuntonan.

ARUBA

Riba e desaroyo financiero di Aruba, Plasterk no kier a duna ningun comentario. Como tal, no ta mucho cla si e proposicion di Aruba pa haci e supervision fiscal door di un colegio fiscal propio, ta algo cu Hulanda por biba cune. Te awor Hulanda a prefera un supervision di CFT, enbes di e colegio fiscal ‘local’. E unico cu e mandatario kier a bisa di Aruba, ta cu e ta contento cu gobernador di Aruba, Freddis Refunjol algun dia pasa a firma e presupuesto 204 adapta. “Nan por sigui por lo menos un luna mas cu e presupuesto aki” Plasterk a bisa.

SINT MAARTEN

E plan di accion cu St Maarten cu Plasterk a anuncia na mitar di november, lo wordo discuti mas lew cu e gobierno nobo. “E autoridad di integridad cu mester wordo lanta ainda, tin cu wordo ancra (den ley) ainda. Nos ta prefera pa haci esaki hunto cu St Maarten. Mi ta kere cu ta mas fructifero si haci esaki cu un gobierno nobo” Plasterk a sigui bisa.

SUPERVISION

Pa Plasterk, ta importante tambe cu Hulanda por tin supervision riba e progreso di integridad, pa por mehora esaki. “Hulanda kier pa e autoridad di integridad no raporta solamente na e isla di St Maarten, pero tambe na Den Haag, pasobra e gobierno ta parti di forma parti di e punto di atencion di e rapport di integridad traha pa Price Waterhouse Cooper.

Di Caribisch Netwerk.