Reunion urgente awe nochi pa delinea formato ‘nobo’ di Tumba Festival

ORANJESTAD – E fundacion cu ta organisa Carnaval, esta SMAC, a yama un reunion urgente pa e festival di Tumba. Esaki segun miembro di directiva di SMAC, Darren van Ommeren awe mainta den un comentario pa Noticiacla.com, ta pa deliña e formato con esaki lo tuma lugar. Segun splicacion, for di aña pasa ora cu e organisacion Loco Lobo Productions a anuncia cu nan no ta organisa e festival mas debi na gastonan halto, e evento su existencia a keda cologa den laira. Van Ommeren a sigura cu e festival ta sigui, pero tin cu wak den ki forma y esey ta keda delinea durante e reunion urgente awe nochi.

FOR DI HULANDA

Manera e portal aki a raporta caba, for di Hulanda, minister plenipotenciario pa Aruba Guilfred Besaril a informa cu no por caba cu e tradicion di Festival di Tumba y cu si no tin tumba y su ganador, lo no invita e monarcha di e otro festivalnan tampoco pa presenta na Arubadag. ‘Of tur tres ta bin, of niun ta bin’ tabata e mensahe cla di e mandatario. Esey tambe a pone presion riba e organisacion SMAC, banda di e hecho cu si cancela e festival, e organisacion lo por sufri di critica fuerte y sigur pa e directiva recien eligi. 

E REUNION

Pa loke ta e reunion, esaki ta tuma lugar awe diamars anochi pa 7’or na oficina di SMAC na Weststraat #3. A haci un apelacion pa tur tumbero y lider di banda pa presenta na e reunion aki. Durante e reunion, lo dicidi ki formato e festival lo tuma, y con e musiconan lo por aporta cu esaki. Nota; potret ta di archivo di noticiacla di un festival di tumba anterior.