Besaril:  E Monarcanan di Carnaval por keda afor di Arubadag na Hulanda

Besaril: E Monarcanan di Carnaval por keda afor di Arubadag na Hulanda

Posted on 01/6/2020 3:16 pm AST | Updated on 01/6/2020 3:16 pm AST

ORANJESTAD/ DEN HAAG – ‘Si un bin, tur 3 ta bin. Si un cay afo, tur tres ta cay afo’. Asina minister plenipotenciario na Hulanda Guilfred Besaril a bisa riba su pagina di Facebook, reaccionando riba e polemica cu posiblemente lo no tin festival di tumba e aña aki. E mandatario ta referi na e fiesta di Arubadag, unda cu ta custumber cu ganadornan di e festivalnan durante temporada di Carnaval, ta haya invitacion pa presenta na Arubadag na Hulanda na luna di maart di e respectivo aña. 

PROBLEMA

E mandatario den fin di siman a reacciona riba e supuesto polemica cu a cuminsa. “Mi a tuma nota di e noticia cu tin problema rond e Festival di Tumba di Aruba pa 2020. Mi ta bai sinta den e proximo dianan cu mi equipo, pa despues mi tuma contacto cu esnan responsabel pa cu e evento” Besaril a bisa. “ Decision ni postura definitivo no tin ainda, pero mester fiha uno si lo mas pronto posibel” e mandatario a sigui bisa. Ademas, segun Besaril, e ta considera e tema importante pasobra pa 2 decada tradicion ta cu ta trece e ganadornan pa Arubadag. “ Mi ta di opinion humilde cu esaki no mester cambia. Y na mes momento mi ta cana cu e sentimento cu e ta un totalidad; osea si un bin, tur 3 ta bini. Si un cai afo, tur tres ta cay afo” e mandatario a sigui bisa riba su pagina personal di Facebook

  • Ajax gana nan prome wega di futbol cu nomber di Corsou riba manga

    Ajax gana nan prome wega di futbol cu nomber di Corsou riba manga

    AMSTERDAM – E ekipo di futbol professional di Hulanda Ajax a gana di Sparta Rotterdam cu score di 2-1. Loke a haci e wega interesante pa Caribe Hulandes, ta cu esaki ta nan prome wega di aña, cu nan uniform ‘nobo’ cu Corsou su nomber riba manga di e hungadornan. Un logro di oficina di turismo di Corsou CTB como forma di propaganda e isla mas ainda. Fuera di e nomber riba manga, tabatin propagandanan riba e bandanan di e tereno, bon visible. E wega tabata den cuadro di caridad, unda cu por a haci donacion pa un hospital di mucha (Emma Kinderziekenhuis). 

  • Gobierno Hulandes kier limita tiramento di klapchi mas ainda

    Gobierno Hulandes kier limita tiramento di klapchi mas ainda

    DEN HAAG – Gobierno Hulandes kier limita tiramento di klapchi mas ainda. Esey minister di husticia Hulandes Grapperhaus a bisa diabierna despues di conseho di minister. Un punto importante pa e decision ta e forma con esey a sosode cu e conseho di e organo di investigacion pa seguridad. E instancia ey a sugeri un paro riba klapchi y vuurpijl. E pregunta di kico exacto e mandatario kier prohibi, no ta conoci. 

  • Blok: Informacion di Hulanda tambe ta indica cu Iran a derumba avion di Ukraina

    Blok: Informacion di Hulanda tambe ta indica cu Iran a derumba avion di Ukraina

    DEN HAAG – Servicio di inteligencia Hulandes ta confirma cu e Boeing 737 di Ukraina cu a cay e siman aki na Teheran, mas probable a wordo derumba. Asina e portal di noticia Hulandes NOS ta raporta. Un dia prome caba Merca ta indica esey, pero Iran a desmenti esey diabierna mainta. Segun minister di defensa Hulandes Ank Bijleveld, servicio Militar HUlandes tin informacion cu e avion a keda derumba pa un misil antiaereo.  Minister di Relacion Exterior Hulandes Stef Blok a bisa na Bruselas cu servicio di inteligencia Hulandes tin e informacion aki. “Nos mesun servicio di inteligencia a wak na e informacion” Blok a bisa. E ta na Bruselas hunto cu ministernan Europeo ta discutiendo e situacion di Irak y Iran. Awor ta keda pa tene un investigacion rigoroso. “Ta importante pa nos sostene otro” Bijleveld a bisa. E ta yama e desastre aereo algo teribel. Hulanda ta unis u mes na loke prome minister Canades Trudeau a bisa un dia prome. 

  • VNO: Bishita di minister Knops ta uno ‘regular’ pa islanan ABC

    VNO: Bishita di minister Knops ta uno ‘regular’ pa islanan ABC

    DEN HAAG – E bishita di minister Hulandes pa Relacionan di Reino y Asuntonan Interno Raymond Knops ta uno ‘regular’ pa islanan ABC otro siman. Asina e oficina di representacion di gobierno Hulandes na Aruba VNO a bisa den un comunicado diaranson merdia. Esaki ta confirma e noticia anteriormente di noticiacla.com di binimento di Knops pa Aruba. E ta bishita Aruba diadomingo y dialuna y ta sigui pa Bonaire diamars. 

  • KLM por lo pronto no ta bula riba Iran y Iraq

    KLM por lo pronto no ta bula riba Iran y Iraq

    SCHIPHOL – E aeroliña Hulandes KLM por lo pronto no ta bula riba Iraq y Iran. Asina e compania a dicidi despues di e disturbionan den e region. Debi na e decision ey, buelonan pa Sur este di Asia y Medio Oriente tin cu bula mas largo cu ta causa retraso di 10 a 12 minuut y ta encera por lo menos 10 buelo.  Diamars anochi Iran a lansa dos raket riba base military na Irak, y no ta conoci kico e daño ta. KLM no kier tuma ningun riesgo. Otro aeroliñanan tambe a tuma medida. Entre nan e aeroliña cu a perde un avion ora esaki a cay diaranson marduga, esta Ukraine International Airlines. Lufthansa no ta bulando entre Iran y Alemania tampoco. Avionan Mericano tambe a keda prohibi pa bula riba Iraq y Iran.  

  • Paspoort Hulandes ta baha na di #7 posicion pero ta keda den top 10

    Paspoort Hulandes ta baha na di #7 posicion pero ta keda den top 10

    ORANJESTAD – Nos paspoort Hulandes den 2020 a baha dos posicion pa loke ta e poder cu e tin, pero ta keda den e top 10. E asina yama Henley Passport index ta rate e pasaportenan mundial a base di e  facilidad di por drenta un pais sin problema. Hulanda ta na #7 cu aceso na 185 pais, hunto cu Suiza, Portugal, Irlanda y Austria. E prome lugar ta pa Japon cu tin acceso na 191 pais. E pio pasaporte ta di Afghanistan na # 107 cu aceso na solamente 26 pais. Hulanda su rango mas halto tabata entre 2011 y 2015, na di 3 lugar, pero a baha na di 5 na 2016, y na 2020 a baha na di 7. Pero, keto bay Hulanda ta den top 10, riba Merca cu ta na # 8 cu aceso na 184 pais cu e pasaporte. Click AKI pa e lista completo di ranking di tur paspoort mundial. 

  • Powered by SETAR