Hooyboer: Hulanda ta acepta plan di Aruba pa garantisa reconocemento di diploma HAVO/VWO

ORANJESTAD – Hulanda a acepta e proposicion di Hulanda riba e asunto di reconocemento di diploma di HAVO y VWO aki dos aña. Esaki ta nifica cu alumnonan no mester tin miedo cu nan diploma e ora ey, lo no tin balor na Hulanda.Minister Michelle Hooyboer-Winklaar a haci e participacion diabierna mainta publicamente. Por lo menos segun e mandatario, pasobra e documentonan mes no a wordo presenta di e acuerdo aki. NoticiaCla.com y otro media a wordo priminti pa e mandatario cu lo evalua si ta suministra prensa cu e carta aki.

MESTER SOSTENE COLEGIO ARUBANO

NoticiaCla.com for di su fuentenan fededigno, a compronde cu den e mesun carta aki, Hulanda ta bisa tambe pa gobierno di Aruba sostene e esfuersonan di Colegio Arubano particularmente, cu nan a haci pa por percura pa no keda atras cu e situacion aki. Esaki ta un punto importante mirando cu e relacion entre gobierno y Colegio no tabata mucho bon durante e periodo aki. Ora cu NoticiaCla.com a puntra e mandatario con e relacion ta aworaki, e mandatario tabata hopi diplomatico.”E ta keda nan (Colegio Arubano) derecho di por a pak aan e asunto aki manera cu nan a mira cu tabata na luga. Nos no por impone esey, pero sigur nos ta mira cu esaki e ta kita obviamente e presion pa por haal e in” Hooyboer a bisa. Segun e mandatario, e confirmacion cu tur cos a keda ‘regla’ ta bin despues di varios luna di preparacion y deliberacion entre e diferente partnernan envolvi.

IMPLEMENTACION

E implementacion oficial ta start aña escolar 2015-2016 y nos ta mira cu lo por finalisa full e proceso aki den un periodo di tres aña. E cambionan ta encera entre otro introduccion di normanan mas estricto pa examen, introduccion di un rekentoets como parti di e exigencianan di examen, ampliacion di e vakkenpakket y introduccion di vaknan nobo den e curriculum di Havo y Vwo.

VAKKENPAKKET

A mustra cu un di e materianan cu ta introduciendo den ‘bovenbouw’ HAVO/VWO, ta papiamento. Pero mester a warda pa e maestronan gradua prome pa por traha, y e metodo tambe por ta cla. Hulanda, segun e mandatario, tambe a bay di acuerdo cu esaki. NoticiaCla.com a busca contacto cu rector di Colegio Arubano, pero e no tabata disponibel e momento ey pa un reaccion. Lo sigui haci e intento.