Accidente atrobe na cruzada Primavera/Wayaca cu hopi daño

ORANJESTAD – Aña a habri cu un accidente na e cruzada ‘popular’ di Primavera/Wayaca diasabra atardi laat. Chauffeur di un SUV Ford no a duna preferencia y a bin dal den un otro SUV cu tabata biniendo di otro banda. E sla tabata hopi duro mes, cu por a scucha e zonido di leu segun testigonan ocular. Den e auto cu a keda alcansa, tabatin dos criatura, cu mester a haya asistencia di ambulance. Nan situacion no tabata grave pero si algo herida na boca y hopi susto. Tabatin hopi daño material pa ambos auto. Notable tabata cu dos ambulance a bin pa duna asistencia y polis dado momento a cera henter e cruzada pa haci nan trabou di investigacion. 

CRUZADA POPULAR

E cruzada aki ta ‘popular’ pa accidente di trafico, unda cu te hasta tabatin morto cu a cay algun aña pasa. Ora cu a traha Green Corridor y mester a usa e cruzada como via alternativa, a dicidi di marca e cruzada di un forma mas sigur, completo cu borchi grandi y marca riba caminda. Pero ni asina esaki no a yuda aparentemente. Ta cada pasa algun siman, tin un accidente ta sosode na e caminda. Den pasado ministernan a priminti pa pone sleeping police y otro cos, pero te ainda nada di esey. Di otro banda, ta keda responsabilidad di cada automobilista pa aplica ley di trafico y core na un forma responsabel. Ni maske cuanto borchi pone, e cruzada aki y otronan ta keda responsabilidad di e automobilista responsabel.