Doño di supermercado Kong Hing ta pidi su bancarota

ORANJESTAD – E doño di e supermercado Kong Hing Supercenter lo pidi pa estado di bancarota dialuna proximo. E doño Farley Jie A Swie a informa su trahadonan pa medio di un carta riba e ultimo dia di aña 2019. E intencion ta pa dia 6 di januari 2020, pidi e bancarota na corte di husticia di Aruba. Motibo di e bancarota ta cu e compania ta den un estado cu e no por paga su debenan mas. 

AÑANAN DIFICIL

E doño ta splica den e carta cu ‘no obstante cu gerencia a trata pa e ultimo añanan di evita cu Kong Hing Super Center NV lo mester cera su portanan, a resulta cu esaki ta un mission imposibel’. A mustra cu e benta ultimo añanan no ta cubriendo e gastonan operacional. Y como tal no por ‘paga e debenan’. 

BANCAROTA

E carta ta sigui splica cu e intencion ta e ora pa laga corte declara e compania bancarota, unda cu e ora tur asunto pendiente lo wordo trata pa un curator cu lo ser apunta pa un huez. A gradici e trahadonan ‘inmensamente pa tur e periodo cu boso a traha pa e compania’, e carta ta finalisa bisando. 

HOPI AÑA 

A compronde cu tin como 20 pa 30 trahado, di cual hopi ta cu e compania for di existencia di e compania. Diabierna mainta a lanta cu un grupo di por lo menos 15 trahado sinta dilanti porta, sin sa kico ta bira nan destino pa 2020.