Cambio di ley por drecha trafico riba avenida Watty Vos Blvd

ORANJESTAD – Mientras cu tin hopi critica riba e comportacion di automobilistanan riba e avenida nobo, Watty Vos Boulevard, no tin suficiente cifra acumula ainda pa hustifica un maneho riba esaki segun vocero di polis Lito Laclé na Noticiacla.com. Pero unabez acumula e informacion necesario, por hustifica e cambio di ley pa drecha fluho di trafico riba e.o. Avenida Watty Vos si ta necesario. 

FAYO

Segun vocero di polis Lito Laclé den e programa NoticiaCla LIVE, berdad tin fayo ta wordo cometi. Por ehempel hende ta core ambos banda di caminda riba e 4 baans weg, cu no ta corecto, of trafico cu ta pega na cierto rotondenan nobo.  

CAMBIA LEY

Segun Laclé, parti di e problema por ta e ley. Aworaki, hopi ta coriendo riba e avenida, estilo highway, usando ambos via pa core siendo cu pa ley, ta un via por core y e otro mester usa pa solamente pasa auto. Aki tin un di e problemanan. “Porta si nos leynan mester wordo adapta na e infrastructura nobo cu tin aworaki” Lacle ta bisa. “Ainda e ley (actual) ta bisa cu bo tin cu core uiterst rechts. Dus eigenlijk coriendo links riba un vierbaansweg, si bo ta core links, ta strafbaar, castigabel” Laclé a sigui splica. “Unico ora cu bo por core links ta si bo ta pasa un auto y drenta bek”. Cosnan cu nos gobernantenan tin cu cambia esaki. 

CIFRA

Cifranan tin cu bay demonstra e patronchi di trafico y si esaki tin cu wordo cambia of no. E camindanan no tin suficiente tempo habri pa genera datos pa por analisa y crea un maneho diferente riba dje. No tabatin hopi accidente riba e dos camindanan. Despues di un aña cu a compila cifra, lo ta suficiente pa por determina un maneho diferente si ta necesario segun Laclé.