Lito Laclé: Fenomeno di ‘Selfmutilating’ ta na practicamente tur scol na Aruba

ORANJESTAD – E fenomeno ‘Selfmutilating’ osea auto mutilacion, a reaparece na scolnan na Aruba den e ultimo cuartal di 2019 y tin cuerpo policial hopi preocupa. Selfmutilating of ‘automutilacion’ ta defini oficialmente como ‘ intencionalmente causa corta na bo curpa, heridando bo curpa directamente sin intencion di comete suicidio’. Vocero di polis Lito Laclé a splica noticiacla.com cu na masha hopi scol, tanto basico como secundario, alumnonan ta practicando esaki, pa cual nan ta hopi preocupa.

LECTURA

Segun Laclé, nan (polis) a nota cu durante nan lectura na scolnan tanto secundario como basico, den e ultimo cuartal, nan a bin haya esaki. A bin confronta cu hopi alumno cu problema mental, social, unda cu e trend cu a bolbe (como 5 aña pasa esaki tabata conoci caba na Aruba) lanta cabez pisa, tabata selfmutilating. “Muchanan ta cortando nan mes. Practicamente na tur scol nos tin e fenomeno aki” Laclé a bisa den e programa NoticiaCla LIVE. 

KICO TA PASA

A splica cu e loke cu e muchanan ta haci, ta usa un blit, pa ‘schef nan mes’.  Mientras cu e por mustra di ta haci como un ‘kick’, e ta mas di haber cu e parti psycologico. “Porta e (mucha) tin un dolor cu (e) ta hayando na cas. Por ehempel tata cu mama no ta bayendo bon, tata ta un adicto, mama ta un adicto, whatever. Dus kico e ta haci pa eigenlijk mitiga e dolor di cas, corta su mes pa mitiga e dolor” Laclé a sigui splica. 

ALUMNONAN TA RETA OTRO

Na cierto scolnan, segun Laclé, a cuminsa reta otro pa hacie y a cuminsa traha video riba youtube. “(Na) hopi scol e ta sosodiendo” Laclé a sigui bisa. A acerca Joendel Sprock di FADA, cu lo atende cu e parti mental di mucha e aña aki (2020). E edad ta varia unda cu Laclé a bisa cu a tuma nota di esaki tanto na scolnan secundario como basico. “E no ta mara na un edad”. Laclé a bisa finalmente cu e ta preocupa. “Mi ta echt preocupa pa 2020 cu esaki”. E problema ta cu un descuido por resulta den suicidio, aunke pa definicion, automutilacion no ta cu e intencion di comete e acto ey.