Aruba tin su prome baby di aña 2020 y e ta un mucha muher

ORANJESTAD – Despues cu Aruba a keda den suspenso riba e prome dia di aña pa e anuncio di e prome baby di aña, porfin diahuebs mainta hospital a confirma cu enberdad no un sino 2 baby a nace riba e prome dia di aña. E diferencia ta cu esaki a sosode den oranan mas atardi, cu a pone cu no a dune e cobertura di custumber, pero ta premira cu esaki lo sosode den curso di diahuebs den dia cu e potret acostumbra. “Asina cu e prome baby y su mama ta stabiel nos lo manda invitacion pa boso cera conoci cu ne”, hospital a informa diahuebs mainta. 

PROME DIA 

Ta normal y custumber cu riba e prome dia di aña, ya den oranan di mainta, prensa ta cera conoci cu e prome baby di aña, saliendo di e punto di salida cu den oranan trempan di marduga/dia, e baby a nace y cu pa mainta e ta cla pa ricibi bishita. Pero diaranson mainta, a bin compronde cu ningun baby no a nace ainda te cu mainta 10’or, cu a pone cu no tabatin ‘cobertura pa baby di aña’. Net prome cu e ora di topa cu e baby nobo, prensa a haya e notificacion di e cancelacion di e cita. A pidi pa keda pendiente y diahuebs mainta e anuncio a bin. Y enberdad awe mainta, hospital a notifica cu “ ayera riba e prome dia di januari 2020 a nace 2 mucha muhe”. E nombernan ta ‘desconoci ainda’ y ta spera cu den curso di dia, lo cera conoci cu ne. Mientrastanto a compronde cu na Corsou si, ya tempran dos pa 3 baby a nace, pues Corsou si tempran tabatin su baby di aña 2020.