Trahadonan di CITGO miembro di FTA a inicia un ‘accion di morocoy’

SAN NICOLAS – Trahadornan di refineria CITGO Aruba, miembro di sindicato FTA a cuminsa un accion di morocoy diamars, segun un carta cu noticiacla.com tin den su poder. E carta di sindicato FTA dirigi na sr Joe Crawford, Interim Vice President and General Manager, ta bisa cu ‘na e momento aki y te na momento cu Citgo Aruba Refinery (CAR) cumpli cu su obligacionan legal y provee e sindicato y su miembronan cu e informacion necesario regardando e futuro di nan empleo, tur miembro di FTA lo bay den un ‘slow down action’. “Esaki kier men cu tur miembro lo continua cu nan obligacion laboral contractual regular, pero na un paso mas ‘lento’”.

SITUACION

E carta ta papia tambe di e situacion cu tin aworaki, unda cu e sindicato ta splica e compania (CITGO) cu e no por conseha su miembronan riba nan siguiente paso, pasobra no tin claridad di parti di CITGO riba e continuacion ‘parcial’ di e acuerdo laboral cu un operador nobo di e refineria y terminal. Ta recorda CAR cu nan (esta CAR) a bisa cu nan no por provee ningun informacion pasobra gobierno di Aruba no ta compartiendo nan informacion riba e plannan. 

ACEPTA DEAL

Ademas, segun e sindicato, ofrece pakete na trahadonan separa y poniendo deadlines pa acepta esaki sin cu tin claridad riba continuidad di trabou, ta pone cu CAR no ta cumpliendo cu su obligacion legal pa comporta su mes como un ‘bon doño di trabou’. “Esaki ta crea un inseguridad serio entre e staff y esaki ta inaceptabel” e carta firma pa e presidente di e sindicato Hubert Dirksz, ta sigui bisa. Wak e carta AKI.