Renaissance a mantene tradicion di haci caya limpi mesora despues di tira pagara!

ORANJESTAD – Mescos cu nan tin e tradicion di tira e pagara di mas largo na Aruba pa varios aña riba e ultimo dia di aña, Renaissance Hotel Aruba tambe tin un otro tradicion. Conciente di medio ambiente y cu tiramento di pagara ta conoci pa laga hopi sushi atras, nan tin un ekipo completo cu ta percura pa mesora despues di e tiramento, e caya ta keda sea mes of mas limpi cu prome cu a tira e pagara. Comentarionan cu por a tende atrobe di esnan cu a presencia e evento, ta bisa cu ‘asina comerciantenan responsabel mester traha’, y 'otro negoshinan por tuma ehempel na Renaissance; y ‘ta ruim op mesora y tene e molester te na un minimo’. E ekipo ta cana tras di e multitude di hende durante e pagara, y pa ora e pagara yega final, ya e caya completo ta limpi limpi. Noticiacla.com a nota cu tabatin varios compania cu tabata haci mescos, aunke den forma mas chikito, pero por lo menos tabatin e intento. Di otro banda, ta conoci cu mayoria negoshi ta tira nan pagara, pero despues ta laga e lugar completamente sushi y ta laga biento haci su trabou. Tin ta haci e caya limpi, su manese of ta simplemente lague pa naturalesa.