Wever: Gobierno ni RdA por tuma trahadonan di CITGO over

ORANJESTAD – Gobierno ni Refineria di Aruba (RdA) por tuma e trahadonan di CITGO over despues di 30 di januari 2020 ora cu CITGO para su operaicon. Asina prome minister Wever a bisa   dialuna den e ultimo conferencia di prensa di gobierno. Gobierno ta parse di ta ‘den scuridad’ pa loke ta pasando e dianan aki na CITGO. Segun Wever, como cu gobierno no ta participe den negosacionan entre sindicato y CITGO, no ta na altura kico ta kico. Esey ta conta pa e pregunta kico ta pasa cu trahadonan despues di dia 30 ora cu e compania stop su operacion, y e keho cu cesantia priminti lo ta mucho abou. 

CESANTIA

P.e. pago di cesantia su haltura, no ta algo cu gobierno por bisa algo ariba. Loke si a sigura ta cu tin leynan nan Aruba y cu e ley di cesantia no ta bay permiti un compania manera CITGO haci excepcion ariba. Tur compania tin cu cumpli cabalmente cu ley riba e pago di cesantia segun Wever. 

DESPUES DI 30 DI JANUARI 

Pa loke ta bay pasa despues di 30 di januari 2020, tampoco e mandatario por a bisa mucho, si mira cu pa cuminsa, e mes no a haya esaki confirma di CITGO sino mas bien a tuma nota di dje den fin di siman di un carta cu ta circula. “Loke mi por bisa en general ta cu e situacion no ta facil” Wever a cuminsa bisa. “E no ta inespera y e no ta nobo. E ta algo cu nos tabata sa di hopi luna cu ta bay pasa momento cu CITGO bay” Wever a continua bisando. Loke gobierno tabata spera, ta cu ora cu aña bolter, lo tabatin un operador nobo cla caba. Pero parse cu CITGO ta strobando cualkier compania di bin drenta y inspecciona e lugar. Cualkier operador nobo kier wak prome cu e dicidi si e ta cumpra. Pero den caso di CITGO, esaki ta birando imposibel. “Esey a pone cu nos ta den un situacion cu nos no por laga un drenta tanten cu e otro no bay”. 

TUMA OVERContrario na e situacion di Corsou unda cu Refineria di Korsou ta tuma trahadornan di e refineria over ora y e operacion cu PDVSA stop diamars, RdA (Refineria di Aruba) no por haci mescos. Aki na Aruba e refineria no ta operando, y no tin entrada ta drenta pa por sigui paga e trahadonan. Como tal RdA no por tuma e trahadonan over y gobierno tampoco.