FTA kier reuni cu premier Wever awe ainda riba CITGO

ORANJESTAD – Sindicato Federacion di Trahadonan di Aruba (FTA) su presidente Hubert Dirksz a solicita un reunion urgente cu prome minister Evelyn Wever Croes pa awe dialuna ainda, 4pm. E topico ta e incertidumbre laboral cu tin pa loke ta e trahadonan di CITGO. E carta, cu noticiacla.com tin den su poder, ta mustra cu e motibo di e reunion ta pa ‘garantisa paz laboral na e refineria y terminal di transferencia di combustible’. Sindicato kier ‘evita escalacion’ di e tension, pero ta bisa cu no por haci mucho sin tin claridad di parti di gobierno. 

CLARIDAD?

Di parti di gobierno, premier Evelyn Wever a bisa e portal aki awe mainta, cu gobierno no tin claridad riba e tema. De hecho, ta e fin di siman aki nan a tuma nota di e carta cu trahadonan di e refineria a haya. Y mucho nan no por haci sino solamente sigura cu e compania ta cumpli cu e leynan laboral pa loke ta e pago di cesantia. Pues e combersacion por bira uno interesante, si esaki keda concedi. 

AWE MAINTA

Mientrastanto, awe mainta e portal aki a raporta caba riba e tema. A splica cu e trahadonan di refineria CITGO na Aruba ta den un standby pa bay den accion, esta cu no ta descarta cu e trahadonan lo tin un paro di trabou. Segun Dirksz, e trahadonan a keda informa cu dia 30 di januari 20209 ta nan ultimo dia di trabou y a haya oferta pa un cesantia minimo. Trahadonan no a acepta esey y kier claridad. Un posibel reunion entre sindicato FTA y Refineria di Aruba (RdA) awe mainta lo mester a trece clarificacion riba e tema aki, pero Dirskz a confirma cu RdA a rechasa e reunion pidi pa awe mainta.  

CITGO

Pa loke ta CITGO, e portal aki tambe a raporta riba e asunto ey. Aki a raporta cu e compania a informa e trahadonan cu dia 30 di januari 2020, refineria CITGO ta para nan operacion. Asina e trahadonan di e refineria a haya tende den un carta diabierna 27 di December 2019 cu ta den poder di noticiacla.com. Den e carta, e compania ta cita problema financiero como e motibo principal debi na sancionan impone pa gobierno Mericano. Hunto den e carta a bin un acuerdo di terminacion pa cada trahadoi cu mester entrega esaki pa 10 di januari 2020, pa nan haya nan cesantia paga dia 24 di januari 2020. E salario lo keda paga separa fin di e luna. 

LEY

E compania ta admiti cu tin ley laboral cu tin cu tene cuenta cu ne, y conforme cu e contracto colectivo, tin cierto procedura cu tin cu tene cuenta cu ne manera haci peticion pa dissolve contracto di trabou. “Sinembargo, pa por cumpli cu palabracionan haci cu gobierno di Aruba, CAR (Citco Aruba Refinery) no tin otro opcion y, pa medio di e comunicacion aki, ta prove e notificacion di terminacion di bo acuerdo di trabou, entrante 30 di januari 2020”.