Gobierno di Corsou a anuncia plan B pa Rdk sigui cu refineria ISLA

WILLEMSTAD – E compania estatal Venezolano PDVSA no ta sigui opera e refineria despues di 31 di december 2019. Ayera nochi prome minister di Corsou Eugene Rhuggenaath a anuncia cu no a yega na un acuerdo pa PDVSA sigui den un fase transitorio. Esey ta nifica cu Refineria di Korsou mes lo sigui cu e refineria temporalmente, incluyendo pago di salario. Trahadonan mientrastanto no ta contento cu e deal cu a cera cu e operador nobo Klesch, y a menasa di bay den accion dialuna. Klesch lo mester cuminsa cu e operacion na medio 2020. 

TRANSITORIO

E intencion tabata pa purba convence PDVSA pa sigui opera e refineria tanten cu Klesch keda cla pa tuma over medio 2020. PVDSA sinembargo a pidi pa 1 aña y no 6 luna. Esey gobierno no por a duna mirando e compromisonan cera cu Klesch, lo stroba e intencion ey. Como tal e premier a papia di implementa ‘plan B’, cu ta toma di e refineria pa RdK mes. Lo ofrece un contracto di trabou individual cu tur trahado door di CRU (Curacao Refinery Utilities) segun e director interino di RdK Marcelino de Lannoy a bisa e corant AD na Corsou. E trahadonan sinembargo lo a rechasa plan . Nan ta exigi un fase transitorio na gobierno di 12 luna minimal.