Encuesta riba e cantidad di dia cu ta permiti tira klapchi

ORANJESTAD – Un di e kehonan cu ta bin tur fin di aña, (mescos cu e asunto di zwarte piet) ta e molester di klapchi pa primordialmente e bestianan di cas. Mientras cu un y tur a y ta crece cu e tradicion di klapchi cu e meta ‘principal’ pa core fuku (mal vibra), tin un concientisacion mas grandi cu tin awor pa cu e molester cu e klapchi aki ta causa bestianan. Noticiacla.com den cuadro di esaki a lansa un encuesta riba su pagina di Facebook, pa un periodo di 6 dia cu ta caba e siman aki diabierna, cu e unico meta pa wak kico ta biba den comunidad. Cada ken ta keda liber pa duna su opinion y esey ta e intencion di e plataforma aki.  

ENCUESTA

E encuesta ta puntra si mester mantene e fechanan di tira klapchi manera cu e ta, of reduci esaki na un dia, esta 31 di December so. Facebook no ta duna e opcion pa un di tres pregunta, esta si kier elimina e klapchi completo of no. Notable ta e reaccion mesora cu esaki a genera te cu awor. Den menos cu 24 ora, un total di 2 mil persona a participa caba y e mayoria ‘chikito’ (diferencia di 300 voto) ta pro pa cambia esaki pa 1 dia (1.100 voto den 24 ora), mientras cu e resto (865) kier pa mantene esaki manera cu e ta. E encuesta ta simplemente un ‘indicacion’ no official, pero si representativo di kico ta biba eyfo pa cu e tema aki. Si tin cu bay tras di e encuesta aki, un mayoria (chikito) kier cambio. 

CONCIENTISACION

Loke por nota tambe, ta cu e aña aki, hasta gobierno a bin cu mensahenan di concientisacion riba e uso di tiramento di klapchi, banda di e instancianan cu normal ya ta haci esaki. Den un articulo adhunto, por lesa tambe con varios hotel (8) miembro di AHATA a opta pa stop cu e custumber di tira klapchi. 

COMENTARIO

Pa loke ta e comentarionan, esaki tambe tabata hopi. Hopi a opta pa fuera di vota, tambe amplia nan pensamento riba esaki. Aki tambe esaki ta varia. Tin ta bisa cu mester stop tiramento completo di klapchi, mientras cu otronan ta sinti cu esaki ta un tradicion, y cu si tin tanto keho riba molester pa bestia, mester ‘simplemente percura pa proteha e mascotanan y e ora por tira klapchi normal’ of mas drastico, ‘no ta presente riba e isla ora cu tin tiramento di klapchi’. Hecho ta cu e  usuarionan ta basta vocal den nan expression. Tur ta derecho ora cu nos ta biba den un pais democratico. Si kier participa na e encuesta, acudi AKI.