Minister a anuncia optimalisacion di seguridad na representantenan di joyeria

ORANJESTAD - Minister di Husticia, mr. Andin Bikker, conjuntamente cu Comisario di KPA y e Unit Tourism Oriented Policing & Security (‘TOPS’), a invita representantenan di joyeria pa un reunion pa splica e pasonan cu ja a wordo tuma di parti di KPA y delibera con conjuntamente por sigui optimalisa e seguridad den e areanan comercial. Asina e mandatario a anuncia diabierna atardi. Esaki probablemente relaciona cu e ola di atraco recien na Aruba. 

CAMARA RIBA FULL RUTA DEN AREA CRUCERO

Manera conoci a percura pa e oficina di TOPS di KPA wordo muda pa un luga mas central den e area crusero. Na e reunion Minister Bikker a participa cu asina cu aña habri lo bay percura pa e oficina nobo di TOPS ta mas visibel, y lo implementa un plan pa instala cameranan moderno riba ful e ruta y den Caya Grandi. Ademas lo introduci un sistema di alerta electronico.

REINTRODUCCION VISIBILITY TEAM

Tambe ta studiando e re-introduccion di un team comparabel cu e ‘Visibility Team’ cu tabata existi den pasado. Ademas a delibera riba otro posibel opcionan technologico y di infrastructura pa por sigui optimalisa e seguridad. E representantenan a keda masha gradici cu e atencion ricibi y e reaccion rapido cu solucionan concreto y positivo pa cu e tema.