A prohibi klapchi nobo 'Master Lightsaber' pa benta na Aruba

ORANJESTAD – E aña aki atrobe, e commission di klapchi a detecta klapchi nobo cu a keda prohibi pa benta na Aruba. Parti di e control di e commission di klapchi tur aña ta pa wak si tin klapchi nobo cu ta cumpli cu e reglanan di benta. Y si no ta asina, ta confisca esaki y of ta prohibi pa bende nan riba mercado. Asina e experto riba explosivos, Rubin Ponson a bisa noticiacla.com diabierna marduga. E biaha aki, ta trata di un klapchi particular cu ta un spada manera estilo di e pelicula Starwars cu yama Master Lightsaber. Un otro cu tabata parse un ‘batata’, (shell), a resulta di no ta nada peligroso y a aprob’e pa uso. 

KLAPCHI STARWARS 

Segun Ponson, esun cu a prohibi, ta estilo di un spade, cu ta bin den un kaha cu algo cu ta parecido na e fontijn cu ta wordo poni riba bolo como bela. Nan ta bin hunto cu un ‘handvat’ di plastic cu tin bacteria den dje. “Anto esey bo ta hinca den e man di plastic (handvat), y pa medio di primi un boton, e ta cende. E ta cende den un forma di un spade di candela. Esey si ta algo cu nos a considera cu no por wordo bendi na publico” Ponson a bisa. Motibo di esaki ta cu e ta viola e regla di maneho, cu ta bisa cu e klapchi mester tin un mecha cu ne y den e caso aki esaki no tin un mecha. “E otro motibo ta tambe cu bo por imaginabo cu algo asina cende manera un spade, kico muchanan nan intencion lo ta bay ta cune. Pues mi ta kere cu ta algo tiki peligroso cu nos por laga bay den comunidad” Ponson a bisa. Como tal a dicidi di a saca for di mercado. Algun otro cos tambe cu a wordo saca afor ta productonan ilegal, klapchi categorisa 1.3, of cu e instruccion robez riba nan.