Rasmijn: Polis por kita permiso di establecimento cu ta bende klapchi

ORANJESTAD – Polis riba orden di minister, por kita permiso di establecimento cu ta bende klapchi. Pero ta Minister (di husticia) ta esun autorisa pa duna ordo cera lugar di klapchi si ta necesario. Asina vocero suplente di polis Liliana Rasmijn ta bisa noticiacla.com riba e aspect di control di e commission di klapchi riba establecimentonan.  

TAREA

Mientras cu oficialmente diasabra e control riba e establecimentonan cu a bende klapchi ta cuminsa, ya diabierna e commission di klapchi lo cuminsa haci nan trabou. Segun miembro di e commission, vocero suplente di polis Liliana Rasmijn, cada un di e miembronan tin nan trabou durante e control. Entre nan, ta pa controla si e permiso di e benta ta visible y na ordo, esta e aña corecto. Bomberonan ta esnan cu ta lidera e commission si. 

PERMISO BIEU

Segun Rasmijn, hopi biaha ta yega na e sitio y ta haya permisonan bieu poni. “Pesey nos ta haci apelacion na tur esnan cu ta bende klapchi, pa pone e vergunning nobo, pegue” Rasmijn a bisa. Tambe mester pone e borchi di ‘No Huma’ den varios idioma, rond di e lugar di benta. Ademas ta check si muchanan bou di 12 aña no por cumpra klapchi, sin un mayor presente y esnan cu ta bende, mester tin 16 aña pariba. Ademas tambe ta controla pa klapchi bieu. E klapchi mester ta mas bieu di 2018 y 2019. Tur cos mas prome cu esey, ta wordo confisca y treci Wela pa wordo destrui. 

CERA ESTABLECIMENTO

Ora cu un establecimento no ta cumpli cu e rekisitonan, ta comunica esaki cu e minister di husticia cu ta dicidi finalmente si ta cera e lugar. ‘Riba orden di dje, e lugar ta wordo cera” Rasmijn a bisa. E ora ta polis ta esun cu ta revoca e permiso y ta cera e lugar. “Nos tarea ta, sea ta kita e vergunning, depende kico tur a wordo constata. Of si ta bisa cu falta algo pa drecha den e container, e ora ta sinta hunto cu DOW of brandweer cu ta duna nan (e lugar) 24 of 2x 24 ora pa drecha e situacion. Nos ta bay controla bek, y ta habie bek e ora.