Polis a detene dama cu a raporta supuesto atraco falso na Washington

ORANJESTAD – E dama cu a raporta e atraco riba su persona recientemente na Washington ora cu un homber cu el a duna lift, lo a asalte, ta deteni. Noticiacla.com tin confirma cu e storia cu e dama a conta, tabata falso y cu e mes lo ta envolvi den ‘robo’ di e suma di placa cu lo mester a keda atraca di dje. Ora cu e dama a conta e storia, esaki no a cuadra y polis a pasa pa detencion di e persona aki despues. E storia tabata fabrica, y no tabata cuadra ya cu un persona cu keda atraca, no ta bay duna un homber lift pasobra e lo a ‘alcanse’ cu su auto. Hopi cos no a cuadra, y na final esaki a resulta e caso tambe pa cual polis a detene e señora mes. 

E SUPUESTO ATRACO

Tabata dialuna mainta pa mas o menos cu 10or central di polis a wordo notifica cu un señora lo a yega na un cas na Washington bisando cu e la wordo atraca. Asina vocero suplente di polis Liliana Rasmijn a informa oficialmente e dia ey. Segun Rasmijn, a despacha e unidad di polis di biaha na dicho sitio.  Na yegada di polis por a compronde cu e señora bayendo direcion di un banco den cercania lo mester a dal un peaton masculino y na unda e la brinde su judansa di biaha pa hibe hospital.  Na caminda pa hospital e hende homber lo a maltrat’e y asina bay cu e placa cu e tabata tin cun’e . E sospechoso lo a huy na pia segun e storia . Departamento di recherche a yega na e sitio pa asina cuminsa cu nan investigacion y tambe polis technico. Slachtofferhulp tambe a presenta pa brinda yudansa na e señora . A mobilisa tur e unidadnan riba caminda pa por captura e sospechoso. A haci uso di e helicopter tambe. Awor ta resulta cu e storia no tabata cuadra.