A transporta prome containernan di klapchi pa benta awe marduga

ORANJESTAD – E transporte di container cu klapchi pa e puntonan di distribucion a cuminsa diabierna marduga for di Wela. Un total di 25 container na final di e mainta, lo mester a keda transporta, pa despues sigui cu control di e 12 containernan di klapchi nobo cu a yega siman pasa. Asina inspector di explosive Rubin Ponson a confirma pa noticiacla.com diabierna marduga na Wela. E prome trekkernan cu container cu klapchi a sali pa mei anochi caba for di Wela. 

PAKICO MARDUGA

Segun Ponson, a opta pa haci esaki marduga, pa motibo di e trafico liviano cu tin, y ta hacie mas sigur pa core cu esaki riba caminda publico. No obstante esaki, cada cargamento ta wordo dirigi pa un patruya policial. “Si nos haci esaki den dia, cu e trafico e ta dura hopi ora pa nos por pasa door di e trafico y yega na e destinacion. Y ademas cada bes cu nos yega na e destinacion, nos por topa cu hopi hende, cu por ta un risico di seguridad” Ponson a bisa. Algo cu si tuma lugar anochi, por evita. E transporte di e klapchinan ta solamente di esnan cu a keda resorta caba y controla.