Ta tres aña caba cu no por test klapchi debi na su yegada laat

ORANJESTAD – Pa di tres biaha caba e klapchinan cu yega Aruba no por wordo getest. Asina e raportahe di Caribisch Netwerk ta mustra. Segun CN, e motibo ta cu atrobe (manera Noticiacla.com a raporta caba) e containernan a bolbe yega laat. Pa di tres biaha cu esaki ta sosode.  Manera e portal aki a raporta caba, ta trata di 20 containers cu a eyga Aruba diabierna mainta y keda transporta pa e localidad special di Wela. 

PREOCUPACION

Tin preocupacion entre e importadornan cu nan tin miedo cu nan no ta haya e klapchi na tempo pa benta. Diabierna awor, 27 di December por cuinsa bende nan. Problema ta (manera cu e portal aki tambe a raporta), por controla apenas 3 container pa dia, pues no ta bay keda cla cu tur container na tempo pa dia 27 awor. Un comerciante a yama minister caba, den e speransa cu esaki por agilisa e proceso. Pero esnan cu ta tene supervision, a bisa cu e comerciantenan mes a causa e situacion y a viola regla. “Pasobra tur klapchi mester ta na Aruba prome cu dia 1 di december”. “Si nan por ta na Corsou na tempo, pakico aki no” Ferdinand Ponson di cuerpo di bombero ta bisa. Faltando apenas algun rato prome cu Pasco, e presion tabata grandi riba esnan cu ta supervisa e trabou y esaki no solamente di parti di e comerciantenan y importadonan. 

CONTROLA KLAPCHI

Door di e retraso di yegada, no por controla (test) e klapchi, sigur no esnan nobo, pasobra esaki ta rekeri un team completo pa esaki. Entre nan, e control riba e seguridad y decibel  (con duro e klapchi ta zona). E testnan aki no por sosode algun dia prome cu pasco. 

SOSPECHO

Ponson tin sospecho pakico tin e tardansa di importacion, pero no kier duna palabra. “Wak, si na Corsou por haci tur cos na tempo, unda cu tabatin containernan aden caba algun luna pasa, esey mester por aki tambe”. 

OVERTIME

Ponson no por sigui papia pasobra durante e entrevista, ta yame pa un reunion urgente cu prome minister y e commission di klapchi, riba e situacion. E importacion laat di klapchi tin efecto tambe riba e saldo di caha di gobierno. Esaki pasobra door di e retraso, e supervisornan, trahado di gobierno, mester cobra overtime, cu mester wordo paga pa gobierno mes. 

Di Caribisch Netwerk