Impasse entre gobierno y hospital ta sigui

ORANJESTAD – ‘Bo tin un director y directiva (di hospital) cu ta kere cu mundo ta draai bou di nan pia”. Esaki ta pensamento di minister di salud Alex Schwengle na NoticiaCla. Asina e ta reacciona riba e hecho cu ainda hospital ta cobrando e suma di 159 florin na Spoed Eisend Hulp, (SHE) no obstante e hecho cu algun siman na dos diferente occasion e la duna ordo pa esey no sosode. “Mi ta haya esey un lastima” e minister ta sigui bisa. E ta sigura cu e la wordo papia, pues no ta un critica cu no ta conoci pa hospital. “Mi a papia cu directiva di hospital siman pasa y nan ta na altura di e precupacionnan cu nos tin”. No ta e intencion pa tin guera cu otro esta entre hospital y gobierno segun e mandatario.

Hospital ta un fundacion casi full sera, pues casi gobierno no por tin influencia riba dje. “E unico influencia cu gobierno tin ta via e dos kroonleden den e raad van toezicht” Schwengle a s sigui bisa. Y e ta haciendo uso di esaki. “Y tin un bestuur cu lamentablemente ta trahando un tiki ‘eenzijdig’. E mandatario ta haya sinembargo cu esaki ta rekeri cooperacion cu otro pa compronde pa bo compronde cu loke bo ta haci un caminda, tin efecto otro caminda. “Esey ta e unico cos cu mi ta puntra. Pa tin un poco comprension. Pero raad van toezicht a pidimi pa mi tin un tiki pasenshi, y duna nan benefit of the doubt pa asina nan mes trece cambio. Pues nos ta dune tempo” Schwengle a bisa finalmente. 

Manera ta conoci, algun siman pasa den forma unilateral, hospital a cuminsa cobra e suma di 159 florin pa personanan cu bin SEH sin cu nan tin un emergencia real. Si e sistema di control (triage) ta determina cu e persona realmente tin un emergencia, e ta wordo atendi sin cobransa extra. Pero si determina cu e no ta algo urgente, ta cobr’e e suma menciona. Un acto cu a wordo condena pa minister Schwengle y tambe hopi critica den comunidad. Esaki pasobra ta sinti cu dificilmente un persona cu no conoce medicina, por determina si su situacion ta un emergencia of no.

Di otro banda, a laga sa cu e practica aki ta pa para e mal uso di personanan cu ta bin hospital pa cualkier cos, siendo cu e ta strobando esnan cu di berdad mester di ayudo. Tin un debate formal andando entre hospital y gobierno y por mira cu hospital ta para firme tras di su decision, y cu na dos occasion caba a ignora e decision di minister pa pone e cobransa aki on hold. Mientrastanto tin combersacionnan ta andando pa yega na un solucion pero e cobransa mientrastanto ta continua tambe.