Noticiacla.com ta scoge Janine Rodriguez como Persona di Aña 2019

ORANJESTAD – Noticiacla.com , despues di ta existi pa 5 aña, a dicidi di pa prome biaha, scoge un persona di aña di Aruba. E escogencia tabata basta facil y a cuminsa cu un sugerencia di un colega periodista algun dia atras. P’esey, cu sumo placer nos ta scoge sra Janine Rodriguez como e prome persona di aña pa nos portal. Den e caso aki e ta bira e persona di aña 2019. 

PAKICO 

E sugerencia cu a sali spontaneamente e siman aki como un sugerencia, y for di un seno di periodismo, a haya hopi reaccion mes. A haci mencion di Janine Rodriguez como un persona cu merece di haya porfin, su reconocemento debido. E persona ta uno hopi conoci, debi na su tipo di trabou, cu sigur no ta uno facil. E ta traha cu Slachtoffer Hulp, cu ta e instancia di gobierno, cu ta atende cu famia di e victimanan cu a keda afecta pa un desgracia, calamidad of algo por el estilo. E ta asisti e famianan cu sea a keda atras, of cu a keda afecta y mester di ayudo familiar. Riba su mes, esaki ta su trabou, pues por bisa cu e ta keda honra pa algo, cu ta realmente su normal. Kico e ora, ta haci cu e merece e premio aki?

SOBREHUMANO

Pa hopi tempo, no tabatin personal suficiente den e departamento, cu a pone cu Janine tabata traha su so. Y mientras cu e trabou tabata aumenta, Janine keto bay tabata ‘su so’. Awor a bin un grupo di persona acerca, pero manera cu algun polis a bisa, Janine mes ta esun cu ta keda encarga y cu tin cu guia nan, y como tal, ta presente keto bay, tur caminda. Y parce cu esunnan cu ta siguie, no por sigui su paso, pasobra e ta asina lihe. Pero keto bay, ta su trabou e ta haciendo, y un persona por wak e como algo normal. 

EXTRA

Loke den e caso aki ta hacie special ta, cu e trabou aki, ta uno cu ta duro, ta exigi hopi di uno, y no ta facil, mirando e casonan cu ta presenta. Pero loke ta haci Janine special ta, cu no obstante tur e trabou aki, cu e so tin cu haci pa un gran parti, e ta envolvi den mil y un otro trabou boluntario, unda cu e ta dedica su tempo liber (e poco cu e tin) na e instancianan caritativo, y casi semper, ta haci esaki tras di cortina. E ta parti regalo pa r muchanan den necesidad durante fin di aña, e ta zorg pa cuminda pa famia di menos recurso fin di aña, aña escolar semper e tin su muchanan cu e ta yuda cu cosnan di scol, e ta yuda den bario, e ta yuda e famianan cu no tin nada, por ehempel frigidaire, stove etc. E famianan cu a perde nan cosnan ora di candela, e ta zorg pa haya paña bek pa nan. Y esaki ta los di su trabou. For di Kiwanis tambe a bin mesora e reconocemento cu ey tambe e ta un fiel ayudante. Y asina tin mas. For di ora cu e sugerencia a cuminsa core, no tabatin un instancia of hende cu no tabata di acuerdo. Basa riba tur esaki, y mas, Noticiacla.com su grupo a reuni y evalua y a dicidi cu ta na su lugar, pa e persona aki haya e reconocemento chikito aki, di un portal hoben, pero cu sigur e persona Janine Rodriguez merece. A compronde cu e mes no ta mucho contento, ora cu e haya e atencion aki, y ta haci tur cos ‘tra’i cortina’. Noticiacla.com kier a felicita Janine Rodriguez cu e titulo aki, y cu e por yuda ta un estimulo pa e sigui haci e trabou y alabes inspira y motiva otro pa tambe haci nan trabou cu dedicacion y pasion. Ademas e portal aki ta spera cu e otronan tambe sigui e ehempel aki y si por, duna un premio aun mas grandi na Janine Rodriquez. Masha Pabien!