Bario di Paradera a organisa su prome Festival di Dande pa mucha

PARADERA - Bario di Paradera a organisa su prome Festival di Dande pa mucha. E ta un evento cu lo pasa den historia como e prome bario cu ta organisa un festival di dande pa por scoge nan reina of rey di dande pa por representa e bario den e Festival di Dande  2019, cu lo tuma luga dia 29 di december na Centro di Bario Tanki Leendert. 

E idea a cuminsa cu invita e scolnan di Paradera pa manda un representante di nan klasnan pa e festival y asina tambe algun mayor di e bario di Paradera tambe a encanta e iniciativa y a inscribi nan yiu tambe pa forma parti di e tremendo idea aki. 

Un anochi cu a conta cu 11 participante den categoria 6 pa 9 aña y 10 pa 13 aña. Tawata hopi emocionante pa mira muchanan cu pa prome biaha a subi escenario pa canta un dande y asina mantene  un parti importante di nos cultura bibo. 

Na final di e anochi, huradonan a anuncia 2 reina di dande di Paradera. Den categoria 6 pa 9 aña e reina di dande di Paradera a keda den persona di Akyrah Thaïna Margarita y den categoria di 10 pa 13 aña e reina di dande di Paradera a keda den persona di Gigi Arends.    Interesante pa menciona tambe ta cu ambos reina di dande di Paradera a representa nan scol Maria Goretti College. 

Tambe a anuncia cu mirando cu e reina di dande di Paradera Akyrah Margarita lo sibi escenario dia 29 acompaña pa Alma Folklorico, comision a dicidi conhuntamente cu e participante cu a sali na di 2 luga den categoria 6 pa 9 aña, Elixiëne tambe lo representa Paradera acompaña pa Tipico Ambiente di Paradera. 

Paradera ta invita henter e comunidad y specialmente e bario y scolnan di Paradera pa asisti dia 29 di december na Centro di Bario Tanki Leendert pa apoya nan 3 participantenan y tambe tur e otro muchanan cu lo participa den Festival di Dande 2019. Asina por cumpli cu e idea principal di inculca y mantene nos cultura bibo den nos muchanan.