Inspectornan di Hulanda a duna KIA un raport cu panorama positivo

ORANJESTAD – Nos instituto coreccional (prison) KIA a haya un rapport positivo (voortgangsrapportage) for di e inspectornan di ministerio di husticia y seguridad di Hulanda, cu a haci e Inspectie verslag . Asina e director Gino Winklaar a informa esnan presente recientemente durante un recepcion na Surfside Marina. Winklaar a mustra di ta contento cu e logro aki. E asina yama inspectie verslag a duna KIA un panorama ‘positivo’, y e ta hopi mas positivo cu loke a experencia den pasado. A felicita tur hende pa e bon trabou haci, aunke a bisa cu ainda falta mas. “Pero mi ta hopi contento” Winklaar a sigui bisa. A repasa loke a bin ta haci, y tambe loke falta pa haci den 2020, unda cu a bisa tin hopi cos bon na caminda. KIA no semper tabata den luz positivo ultimo tempo, y cu esaki,  e ta duna tur hende eynan un boost pa cuminsa 2020 riba un bon pia.

PROCESO DI VACATURA

Cu e Formatierapport vigente pronto lo sinta cu DRH pa palabra e Salaristructuur nobo y pues e proceso di vacature nobo lo start asina pa formalisa nan rechtspositie nobo. Winklaar mes a opta pa no stroba e proceso cu ta andando caba fe 2012, pero si lo evalua esun nobo despues di 1 aña di implementación.

DIRECTOR NOBO

Winklaar mes ta cumpli 6 luna como director nobo di KIA. Despues di sirbi Cuerpo Policial di Aruba (KPA)  pa 19 aña el a sali como Alto Inspector y a asumi un reto nobo, na unda ya caba e ta sinti su mes na cas.  E ta reemplaza Rocco Tjon cu despues a bandona e lugar pa bira Parlamentario. Den 2020, NoticiaCla lo raporta mas amplio riba e tema y plannan pa cu KIA.