Klesch Group a firma ‘intento’ pa tuma refineria Isla over na Corsou

WILLEMSTAD – Cu aprobacion di gobierno di Corsou y e hunta di comisario di Refineria di Korsou (RdK), a firma un acuerdo diadomingo cu Klesch Group pa benta di e edificio y terenonan den erfpacht di e refineria y Bullenbaai. Esaki a keda confirma pa premier Eugene Rhuggenaath na e matutino Antiliaans Dagblad. E acuerdo ta un asina yama ‘transaction document’. Un di e condicionan di gobierno ta cu e compania mester inverti den e refineria, y mester negosha cu sindicatonan pa cu e condicionan di trabou. E fecha exacto pa e toma official no ta conoci ainda  pero ta premira pa mitar di 2020. Den curso di e proximo dia, oranan lo tin un conferencia cu e detayenan.

SEPTEMBER

Tabata na September ultimo cu e compania internacional, Klesch Group, a keda nomina pa hiba e combersacionnan pa toma di refineria Isla. Fin di e aña aki e contract cu PDVSA ta caba, y tabata parce cu e no ta bin bek como e operador. Informacion cu NoticiaCla.com tin ta, cu Klesch Group ta e unico grupo cu tabata poni, pa tene combersacion cu gobierno, riba futuro di e refineria. Klesch Group ta lidera pa A. Gary Klesch, un entrepreneur Mericano, cu a funda e compania na 1990 basa na Geneva, Suiza. E compania ta specialisa den metal, mina, petrolio y gas. Segun Prome Minister di Corsou, Eugene Rhuggenaath e tempo ey, no tabatin ningun garantia cu e grupo aki finalmente lo a bira e operador nobo, pero e garantia duna ta, cu lo a sigui busca un operador te ora cu nan haya.