Izaline, Boy y Tony a haci nan cos den Christmas Under the Stars

ORANJESTAD – Un tras di un, e cancionan tabata bin diasabra anochi durante e presentacion di Izaline Calister, Tony Sherman y Boy Thode diasabra anochi durante e show Christmas under the Star. Despues cu e ‘yiu di tera’ Michel ‘Angelo’ Koolman a ‘warm up’ e publico, tabata ora pa e evento principal mes cuminsa. Boy Thode, sigui pa Tony Sherman y finalmente Izaline Calister duna tur cu tin, sin laga nada afo. Tur hende a haya tur loke nan tabata kier. Un combinacion di un repertorio di pasco, combina cu e cancionan popular, a pone cu tur hende por a canta ‘a todo dar’, durante e anochi completo. 

BOY THODE

Boy Thode a cuminsa cu su temanan popular, asina rapidamente complaciendo su ‘fansnan’ y no a dura mucho cu tur hende tabata cantando coro pa Thode. Mescla cu cancionan di pasco, Thode a sa di  presenta e imagen conoci di dje di ta un ‘rompecorazones musical’, complaciendo un tras di otro. 

TONY SHERMAN

Tony Sherman a sigui, y a mustra rapidamente cu e ta un show man completo. Dentro di un rato, e tabatin e publico den su gara. Su chiste, y otro comentarionan tabata al caso, pa no papia mes di su presentacion. Un voz potente cu ta mustra cu aunke veterano, e voz tey keto bay. El a haci un combinacion di ingles y Papiamento y percura pa duna tur hende ‘un tiki di tur cos’ tambe. 

IZALINE CALISTER

A warda e dama pa ultimo, unda cu unabez cu Izaline Calister a subi scenario, tabata cuestion di minut, prome cu e la kita su sapato. Ora cu el a subi scenario, e mes a hala atencion di e publico. “Boso a wak cu mi tin sapato bisti?”. Esey sinembargo no a dura mucho, ya cu den menos di algun minuut, Izaline a kita su sapatonan y a cuminsa canta pia bou, cu ta su ‘trade mark’ artistico. Mescos cu e otronan, el a sa di gara e publico cu su cancionan di antes, esunan di Pasco y mucho mas. Bendicion, Kanta Helele y Wow’i Cariño no a falta aki tambe. 

HUNTO

Loke hopi a bin pa wak tambe, tabata e union di e tres cantantenan aki. Varios momento nan tabata hunto riba e tarima y a comparti cancionan cu e publico. Loke a cay masha na agrado, tabata e hecho cu a dedica e cancion ‘Abo So’, como un tributo na e tata di Cultura, Padu Lampe cu recientemente a bay sosega. Hunto, Izaline, Tony y Boy a canta esaki y a laga e publico haci 50% di e trabou. Ademas a canta un potpourri bieu di cancionan conoci cu tambe e publico a sa di interactua cu ne. Na tur, un anochi exitoso sigur unda cu tur hende presente, a haya loke cu nan a bin busca. Completo cu e ‘personal show’ ora cu dado momento Boy Thode a baha den publico y sigui canta bay te patras den publico, haciendo loke mas e gusta haci, interacta cu e publico.