Oduber: Un miembro di raad van toezicht di HOH a retira

ORANJESTAD – Mientras cu minister di salud Dangui Oduber a pidi publicamente (e no por ordena esaki pasobra no tin e poder pa haci tal), pa e raad van toezicht di Hospital Horacio Oduber retira, el a informa noticiacla.com diabierna mainta cu por lo menos uno mientrastanto a entrega su retiro entrante 31 di December 2019. E retiro sinembargo tabata prome cu ayera cu e mandatario a referi na e caso di e hunta durante e conferencia di prensa. Mester añadi cu e miembro aki no ta un di e ex ‘kroonleden’ nombra pa e gobierno anterior. 

PROBLEMA

Oduber tin un problema cu dos miembro cu tabata ‘kroonleden’ nombra pa gobierno anterior, pasobra nan ta bek den e hunta, sin aprobacion di gobierno actual. Durante e conferencia di prensa diahuebs, e mandatario tabata basta disgusta riba e asunto unda cu e no por caba compronde pakico e hunta di supervision di hospital ta haci y deshaci, sigur riba un punto cu ta supone cu segun statuut di hospital, gobierno por actua. E ta referi riba e hecho cu segun statuut di hospital, gobierno tin derecho di nombra 2 kroonleden, pero, e mesun statuut ta permiti e raad pa haci loke nan a haci, esta  bolbe nombra e dos personanan (ex kroonleden di gobierno anterior) como miembro. Y segun Oduber, no tin nada cu e por haci al respecto.