E ‘killcage’ na Wayaca ta bira un ‘centro di control di cacho’ na 2020

ORANJESTAD – Despues cu na juni di e aña aki el a anuncia cu e lugar lo conoce cambio, diahuebs porfin prome minister Evelyn Wever a anuncia diahuebs cu na januari ta cuminsa cu e ‘ombouw’ di e asina yama ‘afmaakhok’, osea kill cage na Wayaca. Ta bay remodela, reconstrui e facilidad aki pa asina converti’e den un tipo di un lugar di tene bestia temporalmente mientras cu ta procesa e bestia pa ‘entre otro’ localisa su doño. Tur ta en cuadro di e implementacion di e ley di cacho. “E idea ta cu e kill cage ta bay stop di existi manera cu e ta, y ta bay bin un centro di control di cacho na su lugar” Wever a bisa. 

INQUIETUD

Tabata na juli di e aña aki caba, conocido veterinario Irene Croes cu ta na cabez di e plan nacional pa regla e asunto di cacho, a reacciona caba riba e problema aki. Segun Croes a bisa e tempo ey, ta un hecho cu na Aruba tin demasiado cacho riba caya. Pero e hecho mes ta, cu na Aruba nos tin demasiado doño iresponsabel cu no ta atende debidamente cu nan mascotanan. Ta papia di e problematica di ‘kill cage’, ta papia di e problematica di e ley di cacho, ta papia di e problematica di cachonan riba caya y e tantisimo cachonan cu auto ta dal, pero hopi hende no ta realisa cu indirectamente nan ta papiando di e problematica di e doño iresponsabel. Pasobra realidad ta, ta e doño iresponsabel ta e problema. Prome cu esey na juni caba, Prome minister Wever a anuncia cu e lugar lo cera, pero no a bisa ki dia.