Gobierno kier inicia proceso pa bin cu mediawet na 2020

ORANJESTAD – Ta e intencion di gobierno pa na 2020 inicia e proceso pa bin cu un mediawet. Esaki ta un ley cu ta regula aspectonan di medionan local pa garantisa uniformidad y polaridad di medionan na Aruba. E ta establece reglanan di conducta di kico por y kico no por pa asina tur cos cana ordena riba e tereno aki. Asina prome minister Evelyn Wever Croes a informa durante un conferencia di prensa diahuebs. 

INVENTARISACION

“Loke nos ta bay cuminsa haci, ta inventarisa kico ta e rekisitonan den otro paisnan, ta tene stakeholdersessions cu prensa y instanciananan gubernamental riba e tereno. Y e ora hunto nos ta bay define kico ta bira e cuadro di esaki” Wever a bisa. E deseo di Wever, ta pa e prome cuartaal di 2020 tin e ‘framework’, den kico ta bay move. “Ya caba nos mester sa kico ta e rekisitonan” Wever a sigui bisa. Con liher lo keda cla cu e introduccion di e ley aki, e mandatario no por a bisa. “Mi kier pa e proceso cuminsa pa nos sikiera papia riba e mediawet” Wever a finalisa bisando. 

INTERNACIONAL

Investigacion cu e portal aki a haci ta mustra cu varios pais ta varia riba e tema. Na Merca por ehempel, e constitucion su prome regla ta prohibi gobierno pa limita libertad di expression y libertad di prensa. Pero tin cierto excepcion na libertad di expression. Entre otro, tin regulacion riba medio publico. FCC (Federal Communications Commission) ta prohibi transmission di material indecente riba canalnan public. Mayoria di paisnan Europeo a reemplaza regulacion di media cu leynan di competencia. E leynan aki ta basicamente proteha e consumidor di practica di media contra competencia inhusto. Pero e leynan aki no ta resolve e problema di concentracion di media. Otro paisnan tin cuerponan regulatorio cu ta regula media y su practica. Aruba lo evalua e miho forma pa introduci esun cu ta mas practico pa nos isla, segun Wever. 

.