AZV ta splica kico ta cambia door di Health Tax y ken ta paga AZV

ORANJESTAD – Mirando e confusion cu tin e dianan aki for di momento cu a introduci e asina yama ‘health tax’ pa haya fondo pa AZV, nan tin un splicacion di kico e ta, y mas importante, ken ta paga esaki. AZV ta recorda cu for di 1 di december 2014 un health tax a wordo introduci. Companianan na Aruba ta paga cada luna 1% di nan bedrijfsomzet na Servicio di Impuesto (SIAD) y e placa aki ta destina pa AZV.

PROME CU 1 DI DECEMBER 2014

Antes e fondo di AZV a wordo financia door di prima y un aporte di gobierno (landsbijdrage). Trahadonan ta paga 2,6% di nan salario bruto y e dunado di trabou ta paga 8,9% (hunto ta 11,5%). E prima so no ta suficiente y pesey ta regla den ley cu gobierno ta paga loke resta. Durante tur añanan e suma di landsbijdrage a baha relativamente door cu e porcentahe di prima a wordo subi 2 biaha.

HEALTH TAX

Awor cu tin un Health Tax no kiermen cu AZV ta bay ricibi mas placa cu antes. E ta mas bien un cambio di e manera di financiamento. E pagadonan di prima y di landsbijdrage ta bon mira mes un grupo di persona; hende cu tin trabou of pensioen. E grupo di hende cu ta aporta na AZV via Health Tax ta uno mas grandi. Tur hende cu ta cumpra producto of servicio na Aruba ta aporta indirectamente na AZV via e Health Tax. Esaki tambe ta conta pa hende cu no tin trabou of cu no ta inscribi na Aruba mes, manera turista.