No tin garantia cu containernan di klapchi ta yega e siman aki

ORANJESTAD – Casi tres siman (of mas) laat, e plan ta pa e prome containernan cu klapchi yega Aruba. E regla ta pa e containernan yega Aruba prome cu dia 1 di December ultimo. Pero casi tres siman despues, ainda no tin bista di e containernan aki y e fecha riba cual nan ta poni pa yega, esta diahuebs 19 di December, no ta confirma. Por lo menos no segun miembro di e commission di klapchi na Aruba Ferdinand Ponson. A bisa cu no ta sigur cu e containernan lo yega diahuebs, cu tur e consecuencianan. 

LAAT

Noticiacla.com a raporta caba na comienso di luna aki riba e tardansa grandi di container di klapchi. E tempo ey, tabata experto di explosivo pa DOW, Rubin Ponson cu a informa noticiacla.com cu tin un total di entre 17 pa 22 container cu lo mester ta na caminda pa Aruba yena cu klapchi, pero cu no ta yega pa e fecha stipula. A compronde cu e containernan lo mester a yega te dia 18 of 19 di December 2019, pero cu e agencia encarga tabata purbando pa laga nan yega prome siman di December mes esta di 8 december aunke cu esaki no tabata confirma. Awe esey a resulta cu no a logra esaki tampoco.  

CONSECUENCIA

E consecuencia di esaki tabata e momento ey cu lo tabatin containernan cu lo a cay laat cu procesamento, ya cu ta ‘apenas’ 3 container por keda procesa na Wela pa dia, pa motibonan di seguridad segun Ponson. E proceso ta cu ora cu e containernan yega waf, nan mester wordo kita for di e waf dentro di 24 ora y transporta pa Wela. Eynan mester ‘re-distribui’ nan pa e respectivo re-bendedornan, y warda bek den otro container na Wela. 

CANTIDAD

Mientras cu ta papia di 22 container cu tabata poni pa yega, ta premira cu esaki por a bira 17 container finalmente ya cu tin hende cu lo a dicidi na caminda cu nan no ta importa klapchi mas pa Aruba e aña aki. E cantidad sinembargo ta keda hopi, siendo cu tur aña ta restando basta klapchi  manera cu tabata e caso e aña aki. Tur e clapchinan ey ta keda warda den Wela tambe y mester wordo usa e siguiente aña. 

SANCCION

Mientras cu tin regla  cu e klapchi mester ta na Aruba prome cu 1 di December di e aña en cuestion, no tin ningun sanccion si no cumpli cu esaki. Como tal, segun Ponson, esey ta pone cu hendenan no ta actuando hopi ‘rigido’ pues pa loke ta e cumplimento. Y e portal aki a compronde cu hopi biaha ta trata di hendenan cu no ta tene nan mes na e regla y sin sanccion, hendenan ta haci manera cu nan kier pasobra no tin consecuencia pa nan. Potret ta di archivo di procesamento di klapchi na Wela na 2018.