De Veer: No cambia ‘e regla di wega’ (pa inversionistanan) na caminda

ORANJESTAD – No cambia e regla di wega (pa inversionistanan) na caminda. Un conseho cu comerciante y inversionista local Eduardo de Veer a duna, den e programa Noticiacla LIVE e siman aki unda cu e tabata invitado. E tema principal di e programa tabata 100 aña MetaCorp, esta e compania cu el a maneha pa hopi aña y cu awor e ta Presidente Comisario. “Un inversionista ta bay na unda cu e ta welcome” de Veer ta bisa, indicando cu si esey no tey mas, e ta bay.  Esaki ta conta tambe pa inversionistanan local, cu ta laga nan placa na Aruba. 

INVERSIONISTA

De Veer a opta pa toca e tema tambe di e.o. economia y loke ta molosti’e riba e tereno aki. “Mi ta haya cu tin demasiado antagonismo, polemica rond di inversionistanan” de Veer a cuminsa na bisa riba e tema. E ta splica cu un inversionista di afo (y local) ta haci inversion na beneficio di nos economia. Y hopi biaha politiconan di tur color politico tin un falta di comprension pa cu e tema aki. Algo cu nan tin cu traha riba dje, esta e politiconan, segun e comerciante. 

CON PA DRECHA E SITUACION

Segun de Veer (a planti’e e pregunta cu si e haya e oportunidad pa sugeri y conseha riba kico mester haci, kico esaki lo ta), e prome cos (contesta) cu e lo duna esun cu puntr’e, ta pa ‘no cambia e reglanan di (e) wega na caminda’, esta cu unabez bo a inverti basa riba informacion y acuerdonan cera, laga esaki y no bay cambie na caminda. De Veer a splica den esaki cu ora cu bo drenta den un negoshi, a evalua e circumstancianan di e mercado, bo a evalua e circumstancianan legal, e economia di e pais y bo a tuma un decision. Y bo ta compronde cu bo tin cu tene bo mes na cierto reglanan. Diripiente e reglanan ta cambia, mientras cu bo a inverti caba. Esey por crea un problema pa e inversionista, pasobra e ta keda confronta cu algo cu e no a prepara pe.  

EHEMPEL DI HOTEL

Como ehempel, de Veer ta duna un caso di hotel den un forma cu cosnan cu no mester sosode, pero cu si ta y a sosode. Ora cu un inversionista inverti den un proyecto di hotel pa cual e tin un permiso di hotel, e permiso ta duna pa tempo indefini, y e ta regla cosnan di seguridad y di higiena. “Y diripiente, gobierno ta pasa un ley caminda cu e ta kita bo hotel vergunning y e ta duna bo un nobo, di un duracion relativamente corto, cu yen  di reglanan cu no tabata existi ora cu bo a haci bo inversion. “Esey no ta manera pa bo haci un investment climate manera debe ser” de Veer a bisa. Cu gobierno ta opta pa subi impuesto, ta comprendible.  Por sigui subi impuesto te ora cu e afecta bo compania negativamente. “Y si bo subi belasting demasiado, bo ta afecta margen di e negoshinan” de Veer a sigui bisa. Na medida cu e margen di negoshi baha, nan abilidad di haci cosnan inovativo pa cu empleado, ta bira menos.