Gobierno tin maneho nobo pa otorga permiso pa deporte acuatico

ORANJESTAD - Gobierno tin maneho nobo pa otorga permiso pa deporte acuatico. Minister di Transporte Chris Romero a informa di esaki diaranson den un comunicado. Ta trata pues di un  maneho nobo relaciona cu otorgamento di permiso pa opera un compania cu ta ofrece actividadnan di deporte aquatico

REGLA NOBO 

Den cuadro di e maneho nobo, esaki ta trata specificamente   actividadnan aquatico (transporte di pasahero contra pago y pa establece disponibilidad di boto) segun ex articulo 18 y 21 di e Ordenanza Nacional cu ta regarda awanan y playanan publico (Lb openbare wateren en stranden AB  1987 no. 124). Den anticipacion di un regulacion ministerial nobo a dicidi lo siguiente:

Companianan cu no tin intencion di realisa actividadnan di deporte aquatico den e area zuidwest di e costa na altura di e playanan ubica den e zona di e “low y high rise” hotelnan, pero cu tin como meta pa ofrece biahe den boto, actividadnan di “duik, snorkel y pesca deportivo” entre otro, por bin na remarke pa un permiso si nan ta cumpli cu tur rekisito legal. 

Kier a recorda tur compania aquatico cu den e cuadro di entrega di un permiso of renobacion, mester presenta un seguro di responsabilidad valido pa un (1) aña. E ordenanza ta prescribi den ex articulo 19 cu e compania mester responsabilisa su mes pa medio di un seguro den caso cu comete daño na pasahero y/of tercer parti y/of na propiedad.

Pa e companianan cu tin e intencion di ofrece actividad di deporte aquatico den e area ariba menciona (na altura di e playanan banda di e “low y high rise” hotelnan) ta keda vigente cu e solicitudnan pa cu esaki ta keda reteni te cu un proximo aviso.

Pa cualkier pregunta of informacion, por tuma contacto cu Directie Scheepvaart Aruba (DSA).