Gremio comercial ta sostene aumento di salario minimo

ORANJESTAD – Por lo menos 2 gremio comercial ta di acuerdo cu e anuncio di aumento di salario minimo di diaranson mainta. Tanto Tisa LaSorte (CEO di AHATA) como Michelle de Groot (ATIA) papiando pa nan respectivo gremio, a confirma esaki pa noticiacla.com despues di e anuncio di e minister en cuestion Glenbert Croes. “Nos tabata sa di e aumento. Nos tin representacion den SER y nos tabata di acuerdo conforme e inflatie. Ademas minister a informa nos oficialmente prome cu el a anuncia” de Groot a cuminsa na bisa. “Den e caso aki si ta tin comunicacion vantevoren”, e directora a bisa, cu e ta considera hopi bon. 

AHATA

Mientrastanto AHATA su CEO tambe a comenta algo similar. “Esaki ta un ehempel di un minister usando SER pa conseho y hayando un conseho unanime y acuerdo, incluyendo di sector priva” LaSorte a bisa. AHATA tin representacion di SER y SER tin representacion di gobierno, sindicato y sector priva. “Pues un bon ehempel di busca dialogo, feedback, y un acuerdo prome cu formalisa un decision” LaSorte a sigui bisa.  

ACUERDO

LaSorte pues ta admiti cu nan a bay di acuerdo cu e aumento di 3% di salario minimo. “Y nos ta elogia e minister pa a usa SER y e dialogo cu sector priva. Nos ta spera cu nos por kibra e ciclo di aumento di costo di bida, y despues mester resorta na aumenta salario minimo” e CEO a sigui bisa. “Nos ta sigui reitera cu gobierno mester corta gasto enbes di continua cu e ciclo di inflacion” LaSorte a finalisa bisando.  

CONTRASTE

E reaccionan aki ta contraste di algun dia pasa ora cu e mesun gremionan aki no tabata mucho positivo pa cu e forma con gobierno (lesa: minister di Finanza y Economia Xiomara Maduro) ta anda cu sector priva, primordialmente den forma cu no ta ‘transparente’ y ta actua y despues informa. Esaki pa e posibel introduccion di cambio den reforma fiscal pa 2020. Den caso di minister Glenbert Croes, nan ta content cu el a consulta cu nan prome y a yega na un consensus prome cu participa e informacion.