ATA a presenta obsekio na Hilton Aruba Caribbean Resort & Casino

ORANJESTAD –  Aruba Tourism Authority (ATA) a presenta obsekio na Hilton Aruba Caribbean Resort & Casino. Asina e oficina a informa pa medio di un comunicado. Nan ta repasa e historia y ta recorda cu Aruba su prome hotel luhoso y di piso a habri su portanan na aña 1959 y durante full aña 2019 nan a celebra nan 60 aña di aniversario. Aki nos ta papiando di Hilton Aruba Caribbean Resort & Casino cu originalmente a wordo inaugura dia 18 di juli 1959 bao e nomber di Aruba Caribbean Hotel y asina a habri caminda pa turismo pa nos isla.

Mas cu 60 aña pasa -entre otro- e dos politiconan Oscar Henriquez y Juancho Irausquin tawatin un tremendo vision: pa engrandece turismo pa Aruba. Asina nan a pensa pa traha un hotel luhoso pa atrae turismo y na 1959 e prome hotel di piso, Aruba Caribbean Hotel a wordo oficialmente inaugura. Aki a inicia un era nobo pa cu e economia pa Aruba.

“ Pa nos bay bek un poco den historia: prome cu e segundo guera mundial, LAGO su refineria tawata Aruba su pilar economico principal. Despues di e guera y cu automatizacion, LAGO a dicidi di bini cu un reduccion di su empleadonan causando un desempleo masal pa Aruba”. Asina, entre otro, e dos pionero/politiconan Oscar Henriquez y Juancho Irausquin, a busca un manera di engrandece e fundeshi economico pa Aruba.

Nan a pensa cu Aruba su beachnan blanco, un clima agradabel y su hendenan amical y hospitalario, lo por haci'e un destinacion perfecto pa turismo. Na e momento ey, nos isla tawatin dos hotel, cual tawata Coral Strand Hotel (actualmente Talk of The Town) traha na 1943 y Basi Ruti Hotel na 1954, unda actualmente ta Playa Linda Beach Resort. E tempo ey, cu e construccion y despues e apertura di Aruba Caribbean Hotel, of manera e ta wordo yama den nos comunidad e -Gran Dama-, e economia y infrastructura general di Aruba a cuminsa expande.

Awendia turismo pa Aruba ta conta cu un average di 1.8 miyon turista pa nos destinacion di cual 42.3% di e bishitantenan ‘stay-over’ ta kedando den un di nos highrise hotels, di cual Hilton Aruba Caribbean Resort & Casino ta un di nan, contando cu un total di 357 camber.

Riba e potret por mira entrega di e obsekio for di Aruba Tourism Authority CEO Ronella Tjin Asjoe-Croes hunto cu CMO Sanju Luidens-Daryanani na Vasco Baselli – Gerente General di Hilton Aruba Caribbean Resort & Casino.