AAA: Aruba ta proyecta 1 miyon asiento for di Norte America atrobe

ORANJESTAD – Aruba ta proyecta 1 miyon asiento for di Norte America atrobe, esta pa di dos aña sigui. Asina Aruba Airport Authority NV ta bisa. Fin di aña ta asercando rapidamente y (AAA) ta orguyoso di por comparti e noticia cu 2019 ta mustrando resultadonan fantastico te cu awor. E mercado di Norte America ta wordo spera pa surpasa pa di dos biaha den historia di Aeropuerto di Aruba e capacidad di asiento di 1 miyon cu un temporada di winter ocupa na caminda.  

Pa loke ta e temporada di winter (1 di Oktober, 2019 – 31 di Maart 2020) AAA tin algun noticia interesante pa comparti.  Entre otro e anuncio di 4 ruta “scheduled” y “seasonal”, cu ta La Guardia, Chicago Medellin y Barranquilla! 

-           JetBlue ta sigui expande servicio pa New York  for di 11 pa 16 buelo semanal di Juni 2019 pa Oktober 2020. E aumento plania ta como lo siguiente:

Buelonan diario dobel cu tabata solamente riba Diabierna y Diadomingo lo bira diario, incluyendo un di 3 y di 4 buelo riba Diasabra.  

-           United Airlines ta aumenta buelo “seasonal” pa Chicago for di 2 buelo semanal pa 5 buelo semanal. 

-           American Airlines ta sigui expande nan 1 buelo “seasonal” semanal pa henter aña. Esaki ta bira e di 6 destinacion pa e “One Happy Island” cu American Airlines. Adicionalmente, mirando e demanda creciente durante e temporada peak di Pasco, American Airlines lo opera avionnan mas grandi tipo A321 / A330 for di Philadelphia y Charlotte 

-           Delta Air Lines lo opera 1 buelo semanal adicional pa Boston den December y Januari 2020.  

-           Avianca Airlines pa por ofrece biaheronan for di Aruba mas y mihor opcion di conectividad y probechando di Avianca su network di rutanan global, e aerolinea ta mantene 11 frecuencia semanal apesar di e retonan interno cu ta wordo experencia entre e isla y su coneccionnan cu Bogota, Colombia. 

-           Wingo Airlines ta sigui crese door di agrega 2 servicio semanal nobo durante e lunanan peak di November, December y Januari 2020. 

-           Aruba Airlines lo cuminsa cu 2 buelo non stop 2 biaha pa siman for di Aruba pa Barranquilla y Medellin den December 2019. 

-           KLM ta aumenta capacidad door di bula cu avionnan mas grandi tipo A330-300 mas frecuente pa e destinacion, resultando den 45 asiento adicional riba cada buelo. Hunto cu Delta Air Lines, partner den su joint venture transatlantico, KLM ta haciendo su posicion di mercado mas fuerte entre Norte America y Europa. 

Cu e buelonan adicional aki, Aeropuerto di Aruba lo wordo sirbi pa 27 aerolinea, brindando servicio na 32 aeropuerto internacional den 12 pais y 28 destinacion.  

“AAA su enfoque principal lo ta pa mantene e nivelnan di servicio aereo y impacto di capacidad actual y na mes momento brinda apoyo na e destinacion su esfuersonan pa genera mas demanda. Nos ta conciente di e instabilidad extremo di e industria di aviacion y pesei AAA su compromiso pa cu nos partnernan ta mas fuerte cu nunca. E aña nos dilanto lo tin retonan adicional y lo rekeri pa AAA ta flexible cu nos objetivonan y strategianan di implementacion. Partnership lo ta hopi importante den 2020 mirando cu e competencia ta fuerte y global,” asina AAA su Air Service Development Manager Sra. Jo-Anne Meaux-Arends a bisa.

Na Aeropuerto di Aruba AAA ta orguyoso pa sigui ofrese pasahero y bishitantenan e mihor network di rutanan internacional pa/for di Aruba. Aeropuerto di Aruba ta ansioso pa yama bonbini na tur e bishitantenan den e temporada di winter.