Maduro: Ta aumenta deviezenprovisie en bes di introduci sugar tax na 2020

ORANJESTAD – Gobierno a dicidi cu envez di introduci sugar tax y royalties como un fuente ‘nobo’ di entrada pa gobierno, ta bay aumenta e asina yama deviezenprovisie cu 0.6% na 2020‘. Asina minister di Finanza y Economia Xiomara Maduro a bisa noticiacla.com dialuna atardi. Deviezenprovisie ta un impuesto cu Gobierno ta cobra pa cambio di placa di afor. Mester pensa p.e. ora bo bay cambia florin pa un placa di afor, manera dollar of visa versa.

COMPARTI CU GREMIO

Maduro a bisa e portal aki tambe cu e parti aki di aumento di deviezenprovisie e no a comparti cu gremionan durante e ultimo reunion, pasobra esey no tabata un topico. Durante e reunion a propone e sugar tax y royalties, pero despues di reunion a opta pa laga esey cay. Ta despues a bin cu e reemplazo aki. 

RECLAMO

E reclamo di (falta) di informacion a bin recientemente di gremionan ora cu a bisa cu no a tende nada mas di gobierno di cambionan fiscal cu lo introduci na 2020, y a hala na e bel diabierna durante un conferencia di prensa. Den un otro articulo, noticiacla ta relata e asunto ey mas detaya, unda cu minister Maduro ta reacciona riba e punto ey. A menciona cu a toca e dos posibilidadnan anterior presenta, pero no kico a pasa despues. 

REEMPLAZO

Segun Maduro, ya cu no ta bin cu royalties of sugartax, mester bin cu e placa di otro caminda.  Esaki pasobra a presupuesta e suma cu e dos proposicion (sugar tax y royalties) y conforme e colegio di supervision financiero, ta conta cu e suma ey sino gobierno por haya su mes den problema. “ Y como cu no ta introduci sugartax mas y tampoco royalties ( cobransa riba e placa di hotel cu ta bay afor) a dicidi di bin cu un subida di deviezenprovisie di 0,6% pa asina por haya entrada extra pa cubri gasto di gobernacion”. Maduro a bisa finalmente. E intencion segun e mandatario, ta pa introduci e cambio aki pa 1 di januari 2020.